കൊച്ചി: അന്താരാഷ്ട്ര വിപണിയില്‍ റബ്ബര്‍ ക്ഷാമം കടുത്തതോടെ റബ്ബര്‍ വില ഉയരുന്നു. ആര്‍ എസ് എസ് - 4 ഇനത്തിന് ഇന്നത്തെ വില 164 രൂപയാണ്. തായ്ലാന്‍ഡില്‍ നിന്ന് അന്താരാഷ്ട്ര വിപണിയിലേക്കുള്ള റബര്‍ വരവ് കുറഞ്ഞതാണ് ഡിമാന്‍ഡ് വര്‍ദ്ധിക്കാനും ഇന്ത്യയില്‍ നിന്നുള്ള റബറിന് വില വര്‍ദ്ധിക്കാനും ഇടയാക്കിയത്.
തായ്ലാന്‍ഡിലെ വിപണി വില 184 രൂപയായതോടെ അന്താരാഷ്ട്ര കമ്പനികള്‍ റബര്‍ ലഭ്യതയ്ക്ക് വേണ്ടി ഇന്ത്യന്‍ വിപണിയെ ആശ്രയിച്ചു തുടങ്ങിയത് കേരളത്തിലെ റബര്‍ കര്‍ഷകര്‍ക്ക് പുത്തന്‍ ഉണര്‍വ് നല്‍കിയിരിക്കുകയാണ്. കഴിഞ്ഞ മൂന്നു വര്‍ഷത്തിനിടയിലെ എറ്റവും ഉയര്‍ന്ന വിലയിലേക്കാണ് ഇപ്പോള്‍ റബര്‍ കുതിക്കുന്നത്.
അന്തരാഷ്ട്ര വിപണിയില്‍ റബര്‍ ലഭ്യത ഇനിയും കുറയാനാണ് സാധ്യത. തായ്ലാന്‍ഡിലെ റബര്‍ മരങ്ങളിലുണ്ടായ ഇലവീഴ്ച രോഗം മൂലം റബര്‍പാല്‍ ലഭ്യത ഗണ്യമായി കുറഞ്ഞതും അന്താരാഷ്ട്ര മാര്‍ക്കറ്റില്‍ നിന്ന് അഭ്യന്തര വിപണിയിലേക്കുള്ള റബര്‍ ഇറക്കുമതിക്ക് കേന്ദ്ര സര്‍ക്കാര്‍ ചുങ്കം ഏര്‍പ്പെടുത്തിയതും കേരളത്തിലെ കര്‍ഷകര്‍ക്ക് വലിയ തോതില്‍ ഗുണം ചെയ്യുമെന്നാണ് കരുതുന്നത്. ഇറക്കുമതി ചുങ്കം ഏര്‍പ്പെടുത്തിയത് മൂലം ചൈനയില്‍ നിന്നുള്ള ടയര്‍ ഇറക്കുമതിയില്‍ ഗണ്യമായ കുറവ് രേഖപ്പെടുത്തിയിട്ടുണ്ട്. ഇതോടെ അഭ്യന്തര ടയര്‍ നിര്‍മ്മാണ മേഖലയില്‍ ഉണ്ടായ ഉണര്‍വും റബര്‍ വില കൂടുന്നതിന് സഹായിച്ചിട്ടുണ്ട്. വിപണിയിലെ ഈ അനുകൂല ഘടകങ്ങള്‍ നിലനിന്നാല്‍ റബര്‍ വിലയിടിവ് മൂലം കഷ്ടത്തിലായ കേരളത്തിലെ റബര്‍ കര്‍ഷകര്‍ക്ക് തങ്ങളുടെ ഉത്പന്നത്തിന് മികച്ച വില തുടര്‍ന്നും ലഭിക്കുമെന്നാണ് വിലയിരുത്തപ്പെടുന്നത്.
