തിരുവനന്തപുരം: മുല്ലപ്പള്ളി രാമചന്ദ്രന്‍ കെപിസിസി പ്രസിഡന്റ് സ്ഥാനം ഒഴിയണമെന്ന് കാസര്‍ഗോഡ്‌ എം.പി രാജ്മോഹന്‍ ഉണ്ണിത്താന്‍. 'പരാജയത്തിന്റെ ഉത്തരവാദിത്തം മുല്ലപ്പള്ളി ഏറ്റെടുത്തതില്‍ നിന്നും ഒരു കാര്യം വ്യക്തമാണ്. അദ്ദേഹം ആരെയൊക്കെയോ രക്ഷിക്കാന്‍ ശ്രമിക്കുകയാണ്. അതല്ല, അദ്ദേഹം ആത്മാര്‍ത്ഥമായാണ് കുറ്റം ഏറ്റെടുത്തതെങ്കില്‍ ഇന്നദ്ദേഹത്തിന് ആ സ്ഥാനത്ത് തുടരാന്‍ അര്‍ഹതയില്ല. ഒറ്റയ്ക്ക് ഒരാള്‍ കുറ്റം ഏറ്റെടുക്കേണ്ട കാര്യമില്ല' ഉണ്ണിത്താന്‍ പറഞ്ഞു.
തദ്ദേശ തെരഞ്ഞെടുപ്പ് പരാജയത്തിന്റെ പൂര്‍ണ ഉത്തരവാദിത്വം താന്‍ ഏറ്റെടുക്കുന്നുവെന്ന് കഴിഞ്ഞ ദിവസം മുല്ലപ്പള്ളി രാമചന്ദ്രന്‍ പറഞ്ഞിരുന്നു. വിജയത്തിന് പിതൃത്വം അവകാശപ്പെടാന്‍ ഒരുപാട് പേരുണ്ടാകും എന്നാല്‍ പരാജയം അനാഥനാണ്. ലോക്‌സഭാ തെരഞ്ഞെടുപ്പില്‍ ഇരുപതില്‍ 19 സീറ്റ് ലഭിച്ചിട്ട് വന്നപ്പോള്‍ തനിക്കാരും പൂച്ചെണ്ട് തന്നില്ല. തെരഞ്ഞെടുപ്പ് വിജയം കൂട്ടായ പ്രവര്‍ത്തനമാണെന്നാണ് അന്ന് പറഞ്ഞതെന്നും കൂട്ടായ നേതൃത്വത്തില്‍ വിശ്വസിക്കുന്നുവെന്നും മുല്ലപ്പള്ളി വ്യക്തമാക്കിയിരുന്നു.
അതിനിടെ, യുഡിഎഫ് ഏകോപന സമിതി യോഗം ഇന്ന് തിരുവനന്തപുരത്തു ചേരും. തെരഞ്ഞെടുപ്പ് പരാജയം അവലോകനം ചെയ്യുകയാണ് പ്രധാന അജണ്ട. തെരഞ്ഞെടുപ്പില്‍ സംഭവിച്ച വീഴ്ചകള്‍ വിശദമായി ചര്‍ച്ച ചെയ്യാന്‍ രാഷ്ട്രീയകാര്യ സമിതി അംഗങ്ങള്‍, എംപിമാര്‍, എംഎല്‍എമാര്‍ ഉള്‍പ്പടെയുളളവര്‍ ജനുവരി 6,7 ദിവസങ്ങളില്‍ യോഗം ചേര്‍ന്ന് ചര്‍ച്ച ചെയ്യും. ജനുവരി 22 ന് ബ്ലോക്ക് തല ചര്‍ച്ച നടക്കും. 23, 24,26 തീയതികളില്‍ 14 ജില്ലകളിലും ചര്‍ച്ചകള്‍ നടക്കും.
