ഡല്ഹി: നിര്ഭയാ കേസിലെ പ്രതികളിലൊരാളായ പവന് കുമാര് ഗുപ്തയുടെ ദയാ ഹര്ജി രാഷ്ട്രപതി തള്ളി. വധശിക്ഷ ഇളവുചെയ്തു ജീവപര്യന്തമാക്കി തരണമെന്നാവശ്യപ്പെട്ട് പവന് കുമാര് ഗുപ്ത സുപ്രീം കോടതിയില് നല്കിയ ഹര്ജി തള്ളി മണിക്കൂറുകള്ക്കകമാണ് രാഷ്ട്രപതി രാം നാഥ് ഗോവിന്ദ് ദയാഹര്ജി തള്ളിയത്.
വധശിക്ഷ ഒഴിവാക്കി ജീവപര്യന്തമാക്കി തരണമെന്നാവശ്യപ്പെട്ട് പ്രതി നല്കിയ തിരുത്തല് ഹര്ജി സുപ്രീം കോടതിയില് ജസ്റ്റിസ് എം.വി. രമണയുടെ ബെഞ്ചാണ് തള്ളിയത്. മാര്ച്ച് മൂന്നിന് രാവിലെ ആറുമണിക്ക് വധശിക്ഷ നടപ്പിലാക്കണമെന്ന മരണ വാറണ്ട് ഡല്ഹി അഡിഷണല് സെഷന്സ് കോടതി റദ്ദാക്കി. പുതിയ മരണ വാറന്റു ഉടന് കോടതി പുറപ്പെടുവിക്കും.
മാര്ച്ച് 3-ന് പ്രതികളെ തൂക്കിലേറ്റണമെന്ന ഡല്ഹി അഡിഷണല് സെഷന്സ് കോടതി ഉത്തരവു മറികടക്കാന് വേണ്ടിയാണ് പ്രതി പവന് കുമാര് ഗുപ്ത പുതിയ ഹര്ജി നല്കിയിരുന്നത്. എന്നാല് തിരുത്തല് ഹര്ജിയും ദയാ ഹര്ജിയും ഒറ്റ ദിവസം കൊണ്ട് തീര്പ്പാക്കിയതിനാല് ഇനി പ്രതികള്ക്ക് മുന്പില് നിയമപരമായ മറ്റു വഴികളൊന്നും അവശേഷിക്കുന്നില്ല. അതുകൊണ്ടു തന്നെ പാട്യാല കോടതിയുടെ പുതിയ മരണ വാറന്റു അന്തിമമായിരിക്കും.
കേസില് പവന് കുമാര് ഗുപ്ത. മുകേഷ് കുമാര് സിംഗ്, വിനയ്കുമാര് ശര്മ, അക്ഷയ് എന്നീ 4 പ്രതികളാണ് വധശിക്ഷ കാത്തുകഴിയുന്നത്. കേസിലെ ഒന്നാം പ്രതി രാം സിംഗ് ശിക്ഷാ വേളയില് തീഹാര് ജയിലില് തൂങ്ങി മരിച്ചിരുന്നു. പ്രായപൂര്ത്തിയാകാത്ത മറ്റൊരു പ്രതി മൂന്നു വര്ഷത്തെ ജുവനയില് ശിക്ഷ പൂര്ത്തിയാക്കി ജയില് മോചിതനായിരുന്നു.