കൊച്ചിയിൽ യുവനടിയെ അപമാനിച്ച കേസിൽ അറസ്റ്റിലായ പ്രതികളുടെ അറസ്റ്റ് രേഖപ്പെടുത്തി. മലപ്പുറം പെരിന്തൽമണ്ണ സ്വദേശികളായ ആദിൽ, റംഷാദ് എന്നിവരുടെ അറസ്റ്റാണ് രേഖപ്പെടുത്തിയത്. കഴിഞ്ഞ ദിവസം കളമശ്ശേരി പൊലീസിൽ കീഴടങ്ങാനെത്തിയ ഇരുവരെയും പൊലീസ് കസ്റ്റഡിയിൽ എടുക്കുകയായിരുന്നു. കുസാറ്റ് പരിസരത്ത് വെച്ചാണ് പൊലീസ് ഇവരെ കസ്റ്റഡിയിൽ എടുത്തത്. പ്രതികളെ ഇന്ന് രാവിലെ 11 മണിക്ക് കോടതിയിൽ ഹാജരാക്കും. പ്രതികളെ തിരിച്ചറിയേണ്ടതുണ്ട്. പ്രതികളെ കോടതിയിൽ ഹാജരാക്കുന്നതിന് മുമ്പ് ഇതിനുള്ള നടപടികൾ പൊലീസ് പൂർത്തിയാക്കും. ചോദ്യം ചെയ്യുന്നതിനായി പ്രതികളെ പൊലീസ് കസ്റ്റഡിയിൽ ആവശ്യപ്പെടും.
ഞായറാഴ്ചയാണ് കേസിലെ പ്രതികളെ തിരിച്ചറിഞ്ഞത്. മാധ്യമങ്ങൾക്ക് മുമ്പിൽ എത്തിയ ആദിലും റംഷാദും നടിയോട് മാപ്പ് പറഞ്ഞിരുന്നു. അപമാനിക്കാൻ ശ്രമിച്ചിട്ടില്ലെന്നായിരുന്നു പ്രതികൾ പറഞ്ഞത്. ഒളിവിലായിരുന്ന പ്രതികൾ പൊലീസിന് മുമ്പിൽ കീഴടങ്ങുമെന്ന് അഭിഭാഷകൻ അറിയിച്ചിരുന്നു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
പ്രതികൾക്ക് മാപ്പപേക്ഷ സ്വീകരിച്ചതായി നടി കഴിഞ്ഞ ദിവസം വ്യക്തമാക്കിയിരുന്നു. ഇരുവരുടെയും കുടുംബങ്ങളെ ഓർത്താണ് യുവാക്കൾക്ക് മാപ്പ് നൽകുന്നതെന്ന് ഇൻസ്റ്റാംഗ്രാം പോസ്റ്റിലൂടെ നടി പറഞ്ഞു. വിഷമഘട്ടത്തിൽ തനിക്കൊന്നും നിന്ന കുടുംബത്തിനും സുഹൃത്തുകൾക്കും പൊലീസിനും മാധ്യമങ്ങൾക്കും നടി നന്ദി അറിയിച്ചു.
