മഹാരാഷ്ട്ര മുന്‍ മുഖ്യമന്ത്രി ദേവേന്ദ്ര ഫഡ്‌നാവിസിനെതിരെയുള്ള ക്രിമിനല്‍ കേസുകളില്‍ കുറ്റവിചാരണയ്ക്ക് അനുമതി. 2014ലെ പൊതു തെരഞ്ഞെടുപ്പില്‍ രണ്ട് ക്രിമിനല്‍ കേസുകള്‍ മറച്ചുവച്ചു എന്ന പരാതിയിലാണ് ഫഡ്നാവിസ് വിചാരണ നേരിടേണ്ടി വരിക. നാഗ്പൂരിൽ നിന്നുള്ള നിയമസഭാ അംഗമാണ് ഫട്നാവിസ്.
2019 നവംബറിന് ശേഷം കേസില്‍ നേരിട്ട് ഹാജരാകുന്നതില്‍ നിന്ന് കോടതി അദ്ദേഹത്തിന് ഇളവു നല്‍കിയിരുന്നു. 1996ലും 1998ലും ഫഡ്നാവിസിനെതിരെ വഞ്ചന, വ്യാജരേഖ ചമയ്ക്കല്‍ എന്നീ ആരോപണത്തില്‍ കേസ് രജിസ്റ്റര്‍ ചെയ്തിരുന്നു. എന്നാല്‍, ഇക്കാര്യങ്ങള്‍ ഫഡ്നാവിസ് തെരഞ്ഞെടുപ്പ് സത്യവാങ്മൂലത്തില്‍ വെളിപ്പെടുത്തിയിട്ടില്ലന്നതാണ് ആരോപണം. 1951ലെ ജനപ്രാതിനിധ്യ നിയമത്തിലെ വകുപ്പ് 125 എ പ്രകാരം വിവരങ്ങള്‍ മറച്ചു വയ്ക്കുന്നത് കുറ്റകരമാണ്.
