ഡല്ഹി: തെലുങ്ക് സിനിമാ താരം രാം ചരണിന് കൊവിഡ് സ്ഥിരീകരിച്ചു. ട്വിറ്ററിലൂടെ താരം തന്നെയാണ് ഇക്കാര്യം ആരാധകരെ അറിയിച്ചത്. രോഗലക്ഷണങ്ങളില്ലെന്നും താന് വീട്ടില് നിരീക്ഷണത്തിലാണെന്നും എത്രയും വേഗം രോഗമുക്തി നേടുമെന്ന് പ്രതീക്ഷിക്കുന്നതായും താരം ട്വീറ്റ് ചെയ്തു.
കഴിഞ്ഞ ദിവസങ്ങളില് താനുമായി സമ്പര്ക്കം പുലര്ത്തിയവരെല്ലാം കൊവിഡ് പരിശോധനയ്ക്ക് വിധേയരാവണമെന്നും അദ്ദേഹം അഭ്യര്ത്ഥിച്ചു. കഴിഞ്ഞ മാസം രാം ചരണിന്റെ പിതാവും തെലുങ്ക് നടനുമായ ചിരഞ്ജീവിയ്ക്ക് കൊവിഡ് ബാധിച്ചതായി ട്വീറ്റ് ചെയ്തിരുന്നു എന്നാല് പിന്നീട് നടന്ന പരിശോധനയില് തനിക്ക് അസുഖം ബാധിച്ചിട്ടില്ലെന്നും തെറ്റായ ഫലങ്ങളായിരുന്നു ആര്ടിപിസിആര് പരിശോധനയില് ലഭിച്ചതെന്നും അദ്ദേഹം വ്യക്തമാക്കിയിരുന്നു.
രാമ രൗദ്ര റുഷിതമാണ് (ആര്ആര്ആര്) രാം ചരണിന്റെ അടുത്ത ചിത്രം. ആലിയ ബട്ട്, അജയ് ദേവ്ഗണ്, ജൂനിയര് എന്ടിആര് തുടങ്ങി വന് താരനിര അണിനിരക്കുന്ന ചിത്രം സംവിധാനം ചെയ്യുന്നത് എസ്എസ് രാജമൗലിയാണ്. ബ്രിട്ടീഷുകാര്ക്കെതിരെ പോരാടിയ അല്ലൂരി സീതാരാമരാജു, കൊമരം ഭീം എന്നീ ഇതിഹാസനായകന്മാരുടെ കഥയാണ് ആര്ആര്ആര് പറയുന്നത്.