വരുന്ന നിയമസഭാ തിരഞ്ഞെടുപ്പില്‍ പാലായില്‍ മാണി സി. കാപ്പന്‍ എംഎല്‍എ യുഡിഎഫ് സ്ഥാനാര്‍ഥിയാകുമെന്നാണു പ്രതീക്ഷിക്കുന്നതെന്ന് പി. ജെ. ജോസഫ്. ശരദ് പവാറിന്റെ എന്‍സിപിയായി തന്നെ മാണി സി കാപ്പന്‍ മല്‍സരിക്കുമെന്നാണു കരുതുന്നത്. അദ്ദേഹം പാലായില്‍ മല്‍സരിക്കാന്‍ തയ്യാറായാല്‍ യുഡിഎഫിനു വേണ്ടി അദ്ദേഹത്തിന് സീറ്റ് വിട്ടു കൊടുക്കാന്‍ തങ്ങള്‍ തയ്യാണെന്നും പി. ജെ. ജോസഫ് വ്യക്തമാക്കി.
നിലവില്‍ പാലാ സീറ്റിനെ ചൊല്ലി മാണി സി കാപ്പൻ ഇടഞ്ഞ് നിൽക്കുകയാണ്. ജോസ് കെ മാണി ഇടത് മുന്നണിയിൽ വന്നതോടെ പാലാ സീറ്റിൽ അവകാശവാദവുമായി അവർ രംഗത്തെത്തിയിരുന്നു. എന്നാൽ പാലാ വിട്ടൊരു കളിക്കുമില്ലെന്ന ഉറച്ച നിലപാടിലാണ് മാണി സി കാപ്പൻ. പാലാ സീറ്റ് നൽകി മാണി സി കാപ്പനെ ഇടത് പാളയത്തിൽ നിന്ന് തങ്ങളുടെ ഒപ്പമെത്തിക്കാനുള്ള ശ്രമത്തിലാണ് യുഡിഎഫ്.
അവസാന നിമിഷം അട്ടിമറി ഉണ്ടായ തൊടുപുഴ നഗരസഭ ഭരണം ഒരു വര്‍ഷത്തിനുള്ളില്‍ യുഡിഎഫ് തിരിച്ചു പിടിക്കും. യുഡിഎഫിലെ പ്രശ്‌നങ്ങളല്ല മറിച്ച് കൗണ്‍സിലറുടെ കാലുമാറ്റമാണ് അവിടെ ഭരണം നഷ്ടമാകാന്‍ കാരണമായതെന്നും പി ജെ ജോസഫ് പറഞ്ഞു.
