ഹൃദയാഘാതത്തെ തുടർന്ന് ആൻജിയോ പ്ലാസ്റ്റിക്ക് വിധേയനായ മുൻ ക്രിക്കറ്റ് താരവും ബിസിസിഐ പ്രസിഡന്റുമായ സൗരവ് ഗാംഗുലി നാളെ ആശുപത്രി വിടും. സൗരവ് ഗാംഗുലിയെ പ്രവേശിപ്പിച്ച കൊൽക്കൊത്തയിലെ വുഡ്ലാൻഡ് ആശുപത്രി സിഇഒ ഡോക്ടർ രൂപാലി ബസു അറിയിച്ചതാണിത്. വീട്ടിൽ നിരീക്ഷണം തുടരുമെന്നും രൂപാലി ബസു അറിയിച്ചു. മൂന്നാഴ്ചക്ക് ശേഷം ചികിത്സയുടെ അടുത്ത ഘട്ടം നിശ്ചയിക്കും. ഗാംഗുലിയെ ചികിത്സിക്കുന്ന 9 അംഗ വിദഗ്ധ സംഘവുമായി ഹൃദ്രോഗ വിദഗ്ധൻ ഡോ. ദേവി ഷെട്ടി ചർച്ച നടത്തിയ ശേഷമാണ് തുടർ നടപടികൾ തീരുമാനിച്ചത്.
ജനുവരി രണ്ടിനാണ് നെഞ്ചുവേദനയെ തുടർന്നാണ് നാൽപ്പത്തി എട്ടുകാരനായ ഗാംഗുലിയെ ആശുപത്രിയിൽ പ്രവേശിപ്പിച്ചത്. വീട്ടിലെ ജിനേഷ്യത്തിൽ വ്യായായമത്തിൽ ഏർപ്പെട്ടുകൊണ്ടിരിക്കെയാണ് ദേഹാസ്വാസ്ഥ്യം അനുഭവപ്പെട്ടത്. പരിശോധനയിൽ ഹൃദയത്തിൽ തടസം കണ്ടെത്തിയതിനെ തുടർന്ന് ആൻജിയോ പ്ലാസ്റ്റിക് വിധേയനാക്കി.
കഴിഞ്ഞ ദിവസം പ്രധാനമന്ത്രി നരേന്ദ്ര മോദി ഗാംഗുലിയുമായി സംസാരിച്ചു. അസുഖം എത്രയും വേഗം ഭേദമാകട്ടെയെന്ന് പ്രധാനമന്ത്രി പറഞ്ഞു. ഗാംഗുലിയുടെ ഭാര്യ ഡോണയുമായും പ്രധാനമന്ത്രി സംസാരിച്ചു. കേന്ദ്ര ധനകാര്യ സഹമന്ത്രി അനുരാഗ് താക്കൂർ കഴിഞ്ഞ ദിവസം ഗാംഗുലിയെ ആശുപത്രിയിൽ സന്ദർശിച്ചിരുന്നു. ബിസിസിഐ സെക്രട്ടറി ജെയ് ഷായും ഇന്നലെ ഗാംഗുലിയെ ആശുപത്രിയിൽ സന്ദർശിച്ചു.