ഡല്‍ഹി: ഡല്‍ഹി കലാപവുമായി ബന്ധപ്പെട്ട ഹര്‍ജികള്‍ ഈ വെള്ളിയാഴ്ച തന്നെ പരിഗണിക്കാന്‍ ഡല്‍ഹി ഹൈക്കോടതിയോട് സുപ്രീംകോടതി നിര്‍ദ്ദേശിച്ചു. അടുത്തമാസം (ഏപ്രില്‍-13 ) 13 - ലേക്ക് ഹര്‍ജികള്‍ മാറ്റിവെച്ച ഹൈക്കോടതി നടപടി ന്യായീകരിക്കാനാവാത്തതാണെന്ന് സുപ്രീം കോടതി പറഞ്ഞു. ഡല്‍ഹി കലാപവുമായി ബന്ധപ്പെട്ട എല്ലാ ഹര്‍ജികളും വെള്ളിയാഴ്ച തന്നെ പരിഗണിക്കണമെന്നും സുപ്രീംകോടതി ആവശ്യപ്പെട്ടു.
സോളിസിറ്റര്‍ ജനറല്‍ തുഷാര്‍ മേത്തയുടെ ശക്തമായ എതിര്‍ വാദങ്ങളെ തള്ളിയാണ് സുപ്രീം കോടതിയുടെ ഉത്തരവ്. ഇക്കാര്യത്തില്‍ നിരന്തരം ഇടപെടുന്ന സോളിസിറ്റര്‍ ജനറലിന്‍റെ നടപടിയില്‍ കോടതി അസംതൃപ്തി രേഖപ്പെടുത്തി. വിധിപ്രസ്താവം നടത്താന്‍ കോടതിക്കുള്ള സ്വാതന്ത്ര്യം അംഗീകരിക്കണമെന്നും സുപ്രീം കോടതി സോളിസിറ്റര്‍ ജനറല്‍ തുഷാര്‍ മേത്തയെ ഓര്‍മ്മിപ്പിച്ചു.
ജസ്റ്റിസ് മുരളീധര്‍ സ്ഥലം മാറിപ്പോയതിനെ തുടര്‍ന്ന് ഡല്‍ഹി ഹൈക്കോടതി ചീഫ് ജസ്റ്റിസ് ആണ് കേസിലെ ഹര്‍ജികള്‍ പരിഗണിക്കുന്നത് നാല് ആഴ്ചത്തേക്ക് നീട്ടിക്കൊണ്ട് ഉത്തരവിട്ടത്.ഇതിനെതിരായ ഹര്‍ജികളിലാണ് ഇപ്പോള്‍ സുപ്രീം കോടതി ഉത്തരവിട്ടത്.
