ഡല്‍ഹി: റിപ്പബ്ലിക് ദിന പരേഡിന് തടസമുണ്ടായാല്‍ രാജ്യത്തിന് നാണക്കേടാകുമെന്ന് കേന്ദ്ര സര്‍ക്കാര്‍ സുപ്രീം കോടതിയില്‍. കര്‍ഷകരുടെ റാലി തടയാന്‍ ലക്ഷ്യമിട്ട് കേന്ദ്രം സുപ്രീംകോടതിയില്‍ നല്‍കിയ സത്യവാങ്മൂലത്തിലാണ് റിപബ്ലിക് ദിനത്തില്‍ കര്‍ഷകര്‍ പ്രതിഷേധിക്കുന്നത് രാജ്യത്തിന് അപമാനമാകുമെന്ന് കേന്ദ്രസര്‍ക്കാര്‍ വ്യക്തമാക്കിയത്. കര്‍ഷകരുമായി ഒത്തുതീര്‍പ്പിന് പരമാവധി ശ്രമിച്ചു, കാര്‍ഷിക നിയമത്തിന് രാജ്യത്തുടനീളം വന്‍ സ്വീകാര്യതയാണ് ലഭിച്ചിരിക്കുന്നത്. നിയമത്തെ എതിര്‍ക്കുന്നവര്‍ ചില കര്‍ഷകരുമായി ചേര്‍ന്നാണ് പ്രതിഷേധ പരിപാടികള്‍ ആസൂത്രണം ചെയ്യുന്നത്. അത് അംഗീകരിക്കാനാവില്ലെന്നും കേന്ദ്രം വ്യക്തമാക്കി.
കഴിഞ്ഞ ദിവസം കര്‍ഷക സമരത്തില്‍ കേന്ദ്രത്തെ രൂക്ഷമായി വിമര്‍ശിച്ച സുപ്രീംകോടതി നിയമങ്ങള്‍ സ്‌റ്റേ ചെയ്യുകയും കര്‍ഷകരുടെ പ്രശ്‌നങ്ങള്‍ സംസാരിക്കാനായി കമ്മിറ്റി രൂപീകരിക്കുകയും ചെയ്തു. എന്നാല്‍ സുപ്രീംകോടതി നിയമിച്ച സമിതിയെ അംഗീകരിക്കാനാവില്ലെന്ന നിലപാടാണ് കര്‍ഷകര്‍ സ്വീകരിച്ചത്. സര്‍ക്കാരിനെ അനുകൂലിക്കുന്നവരാണ് കമ്മിറ്റിയിലെ അംഗങ്ങള്‍ അവര്‍ നിയമങ്ങളെ ന്യായികരിക്കുകയാണ് ചെയ്യുകയെന്ന് കര്‍ഷകനേതാക്കള്‍ പറഞ്ഞു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
അതേസമയം റിപബ്ലിക് ദിന പ്രതിഷേധത്തില്‍ പങ്കെടുക്കാനായി അമൃത്‌സറില്‍ നിന്ന് ഡല്‍ഹിയിലേക്ക് ട്രാക്ടറുകളുമായി കര്‍ഷക പ്രക്ഷോഭകര്‍ പുറപ്പെട്ടു. റിപ്ലബ്ലിക്ദിന പരേഡിനൊപ്പം ട്രാക്ടര്‍ റാലി നടത്തി പ്രതിഷേധിക്കാനുളള തീരുമാനത്തില്‍ ഉറച്ചുനില്‍ക്കുകയാണ് കര്‍ഷകര്‍. എല്ലാ സംസ്ഥാനങ്ങളിലേയും കര്‍ഷകരോട് ഡല്‍ഹിയിലേക്ക് എത്താന്‍ കര്‍ഷക സംഘടനകള്‍ ആഹ്വാനം ചെയ്തിട്ടുണ്ട്.
