തിരുവനന്തപുരം: കെ.എസ്.ആര്.ടി.സിയില് വ്യാപക ക്രമക്കേടെന്ന് മാനേജിങ് ഡയറക്ടര് ബിജു പ്രഭാകര്. 2012 മുതല് 2015 വരെയുള്ള കാലയളവില് നൂറു കോടിയോളം രൂപ കാണാനില്ല. അക്കാലത്ത് അക്കൗണ്ട്സ് മാനേജരായിരുന്ന ശ്രീകുമാറിനെതിരെ നടപടി സ്വീകരിക്കുമെന്നും അദ്ദേഹം വ്യക്തമാക്കി. നിലവില് എക്സിക്യൂടീവ് ഡയറക്ടറാണ് ശ്രീകുമാര്. ടിക്കറ്റ് മെഷീനില് ഉള്പ്പെടെ കൃത്രിമം കാട്ടി വന് തുക കൊള്ളയടിക്കുന്നതായി കണ്ടെത്തിയെന്നാണ് എം.ഡി തന്നെ വ്യക്തമാക്കുന്നത്.
അതേസമയം, വിവാദ വെളിപ്പെടുത്തലിനു പിന്നാലെ ബിജു പ്രഭാകറിന് എതിരെ പ്രതിഷേധവുമായി ട്രാന്സ്പോര്ട്ട് ഡെമോക്രാറ്റിക് ഫെഡറേഷന് രംഗത്തെത്തി. തൊഴിലാളികളെ അപമാനിച്ചുവെന്ന് ആരോപിച്ചാണ് പ്രതിഷേധം. പഴയ ടിക്കറ്റ് നല്കി കണ്ടക്ടര്മാര് പണം തട്ടുന്നുണ്ടെന്നും, വര്ക്ക് ഷോപ്പിലെ ലോക്കല് പര്ച്ചേസിലും സാമഗ്രികള് വാങ്ങുന്നതിലും കമ്മീഷന് പറ്റുന്നുണ്ടെന്നും എം.ഡി. വെളിപ്പെടുത്തിയിരുന്നു. ഡീസല് വെട്ടിപ്പ് തുടരാനാണ് ജീവനക്കാര് സിഎന്ജിയെ എതിര്ക്കുന്നതെന്നും അദ്ദേഹം ആരോപിച്ചു.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
കെഎസ്ആര്ടിസിയെ വെട്ടിമുറിക്കാനല്ല ശ്രമം. ജീവനക്കാരില് ആരെയും പിരിച്ചുവിടില്ല. എന്നാല് ആളുകളെ കുറയ്ക്കേണ്ടി വരും. 22000 പേരായി ആദ്യഘട്ടം ജീവനക്കാരെ കുറയ്ക്കും. പിന്നീട് 15000 ആയും 10000 ആയും ജീവനക്കാരെ കുറയ്ക്കും. അടുത്ത മൂന്ന് വര്ഷം മുതല് അഞ്ച് വര്ഷം വരെ സമഗ്രമായ മാറ്റം കെ എസ് ആര് ടി സിയില് ഉണ്ടാകുമെന്നും ബിജു പ്രഭാകര് വ്യക്തമാക്കി.
