കെഎസ്ആര്ടിസിയിലെ 100 കോടി രൂപയുടെ ക്രമക്കേടില് വിജിലന്സ് അന്വേഷണത്തിന് ശുപാര്ശ ചെയ്യും. ക്രമക്കേടുകള് കെഎസ്ആര്ടിസിയുടെ വിജിലന്സ് വിഭാഗം അന്വേഷിക്കേണ്ടെന്നാണ് സിഎംഡി ബിജുപ്രഭാകറിന്റെ നിലപാട്. പോക്സോ കേസില് റിമാന്ഡ് ചെയ്യപ്പെട്ട ജീവനക്കാരനെ തിരികെ ജോലിയില് പ്രവേശിപ്പിച്ച എക്സിക്യൂട്ടീവ് ഡയറക്ടര് പി.എം. ഷറഫ് മുഹമ്മദിനെതിരെയും നടപടിയുണ്ടാകും.
കെഎസ്ആര്ടിസിയില് വ്യാപക ക്രമക്കേടാണ് നടന്നതെന്ന് ബിജു പ്രഭാകര് ഇന്നലെ വെളിപ്പെടുത്തിയിരുന്നു. 2012 മുതല് 2015 വരെയുള്ള കാലയളവില് നൂറു കോടിയോളം രൂപ കാണാനില്ല. അക്കാലത്ത് അക്കൗണ്ട്സ് മാനേജരായിരുന്ന ശ്രീകുമാറിനെതിരെ നടപടി സ്വീകരിക്കുമെന്നും അദ്ദേഹം വ്യക്തമാക്കി. നിലവില് എക്സിക്യൂടീവ് ഡയറക്ടറാണ് ശ്രീകുമാര്. ടിക്കറ്റ് മെഷീനില് ഉള്പ്പെടെ കൃത്രിമം കാട്ടി വന് തുക കൊള്ളയടിക്കുന്നതായി കണ്ടെത്തിയെന്നാണ് എം.ഡി തന്നെ വ്യക്തമാക്കുന്നത്.
കെഎസ്ആര്ടിസിയില് അടിമുടി അഴിച്ചുപണി ആവശ്യമെന്നാണ് സിഎംഡി ബിജു പ്രഭാകര് ഇന്നലെ പറഞ്ഞത്. എല്ലാ മേഖലകളിലും വ്യാപകമായ അഴിമതിയും ക്രമക്കേടും കണ്ടെത്തി. ടിക്കറ്റ് മെഷീനില് ഉള്പ്പെടെ കൃത്രിമം കാട്ടി വന് തുക കൊള്ളയടിക്കുന്നതായി കണ്ടെത്തിയെന്നും എംഡി പറഞ്ഞിരുന്നു.
