സംസ്ഥാനത്തെ 5 വയസിന് താഴെ പ്രായമുള്ള 24 ലക്ഷത്തിലധികം കുട്ടികള്ക്ക് പോളിയോ പ്രതിരോധ തുള്ളിമരുന്ന് നല്കുമെന്ന് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. ദേശീയ പോളിയോ നിര്മാര്ജന പരിപാടിയുടെ ഭാഗമായി സംസ്ഥാനത്ത് ജനുവരി 31നാണ് പള്സ് പോളിയോ ഇമ്മ്യൂണൈസേഷന് പരിപാടി നടത്തുന്നത്.
പരിചയം സിദ്ധിച്ച സന്നദ്ധ പ്രവര്ത്തകര് അന്നേദിവസം രാവിലെ 8 മണി മുതല് വൈകുന്നേരം 5 മണി വരെയാണ് പോളിയോ ബൂത്തുകളിലൂടെ പോളിയോ പ്രതിരോധ തുള്ളി മരുന്ന് വിതരണം ചെയ്യുന്നത്. കുഞ്ഞുങ്ങള്ക്ക് പോളിയോ തുള്ളിമരുന്ന് നല്കുന്നതിനായിസംസ്ഥാനത്താകെ 24,690 ബൂത്തുകള് സജ്ജീകരിച്ചിട്ടുണ്ട്. പോളിയോ പ്രതിരോധ മാനദണ്ഡങ്ങളും കോവിഡ് മാര്ഗനിര്ദേശങ്ങളും പൂര്ണമായും പാലിച്ചു കൊണ്ടായിരിക്കും പോളിയോ തുള്ളി മരുന്ന് വിതരണം നടത്തുക.
വാക്സിനേഷന് സ്വീകരിക്കാന് എത്തുന്നവര് മാസ്ക് ധരിക്കുക, കൈകളുടെ ശുചിത്വം ഉറപ്പാക്കുക,സാമൂഹിക അകലം പാലിക്കുക തുടങ്ങി കോവിഡ് പ്രതിരോധ മാര്ഗനിര്ദേശങ്ങള് കര്ശനമായി പാലിക്കേണ്ടതാണ്. 5 വയസിന് താഴെ പ്രായമുള്ള എല്ലാ കുട്ടികള്ക്കും പള്സ് പോളിയോ തുള്ളിമരുന്ന് നല്കണമെന്നും മന്ത്രി വ്യക്തമാക്കി.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
പോളിയോ ഏറെ അപകടകരം
കുട്ടികളുടെ നാഡീവ്യൂഹത്തെ ബാധിക്കുന്ന ഒരു വൈറസ് രോഗമാണ് പോളിയോ. 2011ല് ഇന്ത്യ പോളിയോ വിമുക്തമായെങ്കിലും അയല് രാജ്യങ്ങളായ പാക്കിസ്ഥാന്, അഫ്ഗാനിസ്ഥാന് എന്നിവിടങ്ങളില് പോളിയോ കേസുകള് റിപ്പോര്ട്ട് ചെയ്യുന്നതിനാലാണ് വാക്സിനേഷന് നല്കേണ്ടിവരുന്നത്. പനി, ഛര്ദി, വയറിളക്കം, പേശിവേദന എന്നിവയാണ് പോളിയോ രോഗത്തിന്റെ പ്രധാന ലക്ഷണങ്ങള്. രോഗബാധയുണ്ടായാല് ശരീരത്തിന്റെ ഏതെങ്കിലും ഭാഗങ്ങള് തളര്ന്നു പോകാന് സാധ്യതയുണ്ട് പ്രധാനമായും കൈകാലുകളില് ആണ് അംഗവൈകല്യം ഉണ്ടാകുന്നത്. അതിനാലാണ് പ്രതിരോധ വാക്സിന്റെ പ്രാധാന്യം.
