ഡല്‍ഹി: രാജ്യത്ത് കൊവിഡ് വൈറസിനെതിരായ പ്രതിരോധ കുത്തിവയ്‌പ്പെടുത്തവരുടെ എണ്ണം 57 ലക്ഷം കടന്നു. അമേരിക്കയും ബ്രിട്ടനും കഴിഞ്ഞാല്‍ ലോകത്ത് ഏറ്റവും കൂടുതല്‍ പേര്‍ക്ക് വാക്‌സിനേഷന്‍ നല്‍കിയ രാജ്യമാണ് ഇന്ത്യയെന്ന് കേന്ദ്ര ആരോഗ്യമന്ത്രാലയം അറിയിച്ചു. അമ്പത്തിയെട്ട് ലക്ഷത്തോളം പേരാണ് രാജ്യത്ത് ഇതുവരെ കൊവിഡ് വാക്‌സിനേഷന്‍ സ്വീകരിച്ചത്. 53 ലക്ഷം ആരോഗ്യപ്രവര്‍ത്തകര്‍ക്കും നാല് ലക്ഷം മുന്‍നിര തൊഴിലാളികള്‍ക്കുമാണ് വാക്‌സിന്‍ നല്‍കിയിട്ടുളളതെന്ന് ആരോഗ്യവകുപ്പ് വ്യക്തമാക്കി.
മൂന്നര ലക്ഷത്തിലേറേ പേര്‍ ഇന്നലെ മാത്രം വാക്‌സിന്‍ സ്വീകരിച്ചിട്ടുണ്ട്. ഉത്തര്‍പ്രദേശ്, മഹാരാഷ്ട്ര, രാജസ്ഥാന്‍, കര്‍ണാടക എന്നീ സംസ്ഥാനങ്ങളിലാണ് ഏറ്റവും കൂടുതല്‍ പേര്‍ വാക്‌സിന്‍ സ്വീകരിച്ചിട്ടുളളത്. അതേസമയം, രാജ്യത്ത് കഴിഞ്ഞ ഇരുപത്തിനാല് മണിക്കൂറിനിടെ 12,059 പേര്‍ക്കാണ് കൊവിഡ് ബാധിച്ചത്. 78 പേര്‍ക്ക് ജീവന്‍ നഷ്ടമായി. രാജ്യത്തെ എല്ലാ ആരോഗ്യപ്രവര്‍ത്തകര്‍ക്കും ഫെബ്രുവരി 20 ന് മുന്‍പ് വാക്‌സിനേഷന്‍ നല്‍കാന്‍ കേന്ദ്രസര്‍ക്കാര്‍ സംസ്ഥാനസര്‍ക്കാരുകളോട് ആവശ്യപ്പെട്ടിട്ടുണ്ട്.
