ഡല്‍ഹി: പ്രധാനമന്ത്രി നരേന്ദ്ര മോദി ലോക്സഭയില്‍ പറഞ്ഞ കാര്യങ്ങള്‍ മുഴുവന്‍ വസ്തുതാവിരുദ്ധമായ കാര്യങ്ങളാണെന്ന് സിപിഎം ജനറല്‍ സെക്രട്ടറി സീതാറാം യെച്ചൂരി പറഞ്ഞു. പ്രക്ഷോഭത്തിലേര്‍പ്പെട്ടിരിക്കുന്ന കര്‍ഷകരെ സമരജീവികള്‍ എന്നാണ് പ്രധാനമന്ത്രി വിശേഷിപ്പിച്ചത്. ഇത് അങ്ങേയറ്റം അപലപനീയമാണ്. ജനങ്ങള്‍ സമര പ്രക്ഷോഭങ്ങളില്‍ ഏര്‍പ്പെടുന്നത് തങ്ങളുടെ ജീവിതം മെച്ചപ്പെടുത്താനും ജീവിതായോധനം ഉറപ്പുവരുത്താനുമാണ്. അവരെ കീടങ്ങളായല്ല ദേശാഭിമാനികളായാണ് കാണേണ്ടത്.
തങ്ങളുടെ ഉത്പന്നങ്ങള്‍ക്ക് മെച്ചപ്പെട്ട വില ഉറപ്പുവരുത്താനാണ് കര്‍ഷകര്‍ പ്രക്ഷോഭം നടത്തുന്നത്. കോര്‍പ്പറേറ്റുകളെ സഹായിക്കാനല്ല. കൃഷിയെ തകര്‍ക്കാന്‍ അവര്‍ക്കാവില്ല. ഇത്തരം ആരോപണങ്ങള്‍ ഉന്നയിച്ച പ്രധാനമന്ത്രിയുടെ പ്രസംഗം മുഴുവനായി അവാസ്തവമായ കാര്യങ്ങളാണെന്നും സിപിഎം ജനറല്‍ സെക്രട്ടറി സീതാറാം യെച്ചൂരി തന്‍റെ ട്വിറ്ററില്‍ കുറിച്ചു.
ഫോറീന്‍ ഡയറക്റ്റ് ഇന്‍വെസ്റ്റ്മെന്റിനെ മോദി ഫോറീന്‍ ഡിസ്ട്രക്ടീവ് ഇന്‍വെസ്റ്റ്മെന്‍റാക്കി മാറ്റിയിരിക്കയാണ്. ഈ നിലപാടുകളില്‍ നിന്ന് രാജ്യത്തെ രക്ഷിക്കുക എന്നത് ഏറ്റവും അനിവാര്യമായ കാര്യമാണെന്നും സിപിഎം ജനറല്‍ സെക്രട്ടറി പറഞ്ഞു.
