സമരത്തെ പുച്ഛിക്കുന്നതിൽ പ്രധാനമന്ത്രി നരേന്ദ്രമോദിക്കും, ധനമന്ത്രി തോമസ് ഐസക്കിനും ഒരേ സ്വരമാണെന്ന് പ്രതിപക്ഷനേതാവ് രമേശ് ചെന്നിത്തല. അധികാരം തലക്കുപിടിച്ചതിന്റെ അഹങ്കാരമാണ് തോമസ് ഐസക്കിനെന്നും ചെന്നിത്തല അഭിപ്രായപ്പെട്ടു. തിരുവനന്തപുരത്ത് സമരം നടത്തുന്ന പിഎസ് സി റാങ്ക് ഹോൾഡേഴ്സിന് രാഷ്ട്രീയ ലക്ഷ്യമുണ്ടെന്ന തോമസ് ഐസക്കിന്റെ പ്രസ്താവനയോട് പ്രതികരിക്കുകയായിരുന്നു രമേശ് ചെന്നിത്തല.
തോമസ് ഐസക്കിന് ഇപ്പോൾ സമരങ്ങളോട് പുച്ഛമാണ്. ഇത് ഒരു കമ്യൂണിസ്റ്റ് മന്ത്രിക്ക് ചേർന്നതല്ല. ബുദ്ധിമുട്ടി പഠിച്ച് പിഎസ് സി റാങ്ക് ലിസ്റ്റിൽ ഉൾപ്പെട്ടവർക്ക് ജോലിയില്ല. സമരത്തിന് യുഡിഎഫ് ധാർമിക പിന്തുണ നൽകും. ചട്ടങ്ങളും നിയമങ്ങളും മറികടന്ന് സിപിഎം നേതാക്കന്മാരുടെ ഭാര്യമാർക്കും ബന്ധുക്കൾക്കും പിൻവാതിൽ നിയമനം നൽകുന്നു. ഇതിനെതിരെ സമരം ചെയ്യുമ്പോഴാണ് മുഖ്യമന്ത്രിയും മന്ത്രിമാരും റാങ്ക് ഹോൾഡേഴ്സിനെ അധിക്ഷേപിക്കുന്നത്.