മുംബൈ: കര്‍ഷകര്‍ സമരജീവികളാണെന്ന പ്രധാനമന്ത്രി നരേന്ദ്രമോദിയുടെ പരാമര്‍ശം രാജ്യത്തിന്റെ സ്വാതന്ത്ര്യത്തിനുവേണ്ടി പോരാടിയവരെ അപമാനിക്കുന്നതാണെന്ന് ശിവസേന. പാര്‍ട്ടി മുഖപത്രമായ സാമനയിലാണ് പ്രധാനമന്ത്രിക്കെതിരായ ശിവസേനയുടെ വിമര്‍ശനം. അടിയന്തരാവസ്ഥയില്‍ തുടങ്ങി ആര്‍ട്ടിക്കിള്‍ 370 പിന്‍വലിക്കുന്നതുവരെയുളള വിഷയങ്ങള്‍ക്കായി ബിജെപി സമരം ചെയ്തിട്ടുണ്ട്. ആ ബിജെപിയുടെ പ്രധാനമന്ത്രിയാണ് സമരം ചെയ്യുന്ന കര്‍ഷകരെ സമരജീവികളെന്ന് (ആന്തോളന്‍ ജീവി) പരിഹസിക്കുന്നത്.
കഴിഞ്ഞ ദിവസം പാര്‍ലമെന്റില്‍ വച്ച് പ്രധാനമന്ത്രി നരേന്ദ്രമോദി കര്‍ഷകര്‍ക്കെതിരായി നടത്തിയ പരാമര്‍ശമാണ് വിവാദമായത്. കുറച്ചുകാലമായി രാജ്യത്ത് പുതിയൊരു വിഭാഗം രൂപമെടുത്തിട്ടുണ്ട്, 'സമരജീവികള്‍' ഈ വിഭാഗത്തെ എവിടെയും കാണാന്‍ സാധിക്കും, അഭിഭാഷകരുടെയോ വിദ്യാര്‍ത്ഥികളുടെയോ തൊഴിലാളികളുടെയോ ആരുടെ പ്രക്ഷോഭമായാലും ഇവരെ മുന്‍നിരയില്‍ കാണാന്‍ സാധിക്കും, അവര്‍ക്ക് സമരമില്ലാതെ ജീവിക്കാനാവില്ല, ഇത്തരക്കാരെ തിരിച്ചറിഞ്ഞ് അവരില്‍ നിന്ന് രാഷ്ട്രത്തെ സംരക്ഷിക്കണം എന്നായിരുന്നു പ്രധാനമന്ത്രിയുടെ വിവാദ പ്രസ്താവന.
