ഡല്‍ഹി: കാര്‍ഷികനിയമങ്ങള്‍ ജനപ്രിയമാണെന്നും പഞ്ചാബിലെ ഒരു വിഭാഗം ജനങ്ങള്‍ മാത്രമാണ് നിയമങ്ങളെ എതിര്‍ത്ത് അവയ്‌ക്കെതിരെ പോരാടുന്നത് എന്നും മോദി സര്‍ക്കാര്‍ ഇപ്പോഴും വിശ്വസിക്കുന്നുണ്ടോ എന്ന് മുതിര്‍ന്ന കോണ്‍ഗ്രസ് നേതാവ് പി ചിദംബരം. പഞ്ചാബ് മുനിസിപ്പല്‍ തെരഞ്ഞെടുപ്പില്‍ കോണ്‍ഗ്രസ് വിജയിച്ച പശ്ചാത്തലത്തിലായിരുന്നു പി ചിദംബരത്തിന്റെ ചോദ്യം.
കര്‍ഷകരും, തൊഴിലാളികളും തൊഴിലില്ലാത്തവരും, ദരിദ്രനുമെല്ലാം വോട്ടര്‍മാരാണ്. അവര്‍ക്ക് അവസരം വരുമ്പോള്‍ പഞ്ചാബിലെ വോട്ടര്‍മാരെപ്പോലെ അവരും ബിജെപിക്കെതിരെ വോട്ട് ചെയ്യുമെന്ന് അദ്ദേഹം പറഞ്ഞു. പഞ്ചാബിലെ കോണ്‍ഗ്രസിന്റെ വിജയം ബിജെപിക്കും നരേന്ദ്രമോദിക്കുമുളള ഉചിതമായ മറുപടിയാണെന്ന് കോണ്‍ഗ്രസ് വക്താവ് രണ്‍ദീപ് സര്‍ജേവാല അഭിപ്രായപ്പെട്ടു. ടൂള്‍ക്കിറ്റ് കേസില്‍ ഡല്‍ഹി പൊലീസിന്റെ നടപടിയെയും രണ്‍ദീപ് വിമര്‍ശിച്ചു.
ഞങ്ങള്‍ വിദ്വേഷത്തെ സ്‌നേഹമാക്കി മാറ്റും, ഭക്ഷണം നല്‍കുന്ന കൈകളെ ചേര്‍ത്ത് പിടിക്കും, ഓരോ ഇന്ത്യക്കാരനോടൊപ്പവും നില്‍ക്കും. ഇന്ത്യയുടെ ആത്മാവിനെ ഞങ്ങള്‍ സംരക്ഷിക്കും പഞ്ചാബിലെ വമ്പിച്ച വിജയത്തിന് നന്ദി എന്നായിരുന്നു കോണ്‍ഗ്രസിന്റെ ഔദ്യോഗിക അക്കൗണ്ടിലെ ട്വീറ്റ്. പഞ്ചാബില്‍ എട്ട് കോര്‍പ്പറേഷനുകളിലും 109 നഗരസഭകളിലുമായി നടന്ന തെരഞ്ഞെടുപ്പില്‍ ബിജെപിക്ക് കനത്ത തിരിച്ചടിയായിരുന്നു നേരിടേണ്ടിവന്നത്. വോട്ടെണ്ണിയ ഏഴ് കോര്‍പ്പറേഷനുകളിലും കോണ്‍ഗ്രസ് വിജയിച്ചു.
