ചെന്നൈ: കഴിഞ്ഞ ദിവസം ബിജെപിയില്‍ ചേര്‍ന്ന ഇ ശ്രീധരനെ പരിഹസിച്ച് നടന്‍ സിദ്ധാര്‍ത്ഥ്. 88 വയസല്ലേ ആയുളളു കുറച്ചുകൂടി കാത്തിരിക്കാമായിരുന്നു എന്നയിരുന്നു സിദ്ധാര്‍ത്ഥിന്റെ ട്വീറ്റ്. ഇ ശ്രീധരന്‍ സാറിന്റെയും അദ്ദേഹം സാങ്കേതിക മേഖലക്ക് നല്‍കിയ സേവനങ്ങളുടെയും വലിയ ആരാധകനാണ് ഞാന്‍. അദ്ദേഹം ബിജെപിയില്‍ ചേര്‍ന്നതില്‍ വളരെ എക്‌സൈറ്റഡാണ്. കേരളത്തിന്റെ മുഖ്യമന്ത്രിയാകാന്‍ ആഗ്രഹമുണ്ടെന്നും അദ്ദേഹം പറഞ്ഞിട്ടുണ്ട്. എന്നാല്‍ ഈ തീരുമാനം കുറച്ച് നേരത്തെയായിപ്പോയോ എന്ന് തനിക്ക് തോന്നുന്നുണ്ട്, പത്തോ പതിനഞ്ചോ വര്‍ഷം കൂടി അദ്ദേഹത്തിന് കാത്തിരിക്കാമായിരുന്നു എന്ന് സിദ്ധാര്‍ത്ഥ് ട്വീറ്റ് ചെയ്തു.
കഴിഞ്ഞ ദിവസമാണ് ഡല്‍ഹി മെട്രോ റെയില്‍ കോര്‍പ്പറേഷന്‍ മേധാവിയായിരുന്ന ഇ ശ്രീധരന്‍ ഭാരതീയ ജനതാ പാര്‍ട്ടിയില്‍ അംഗമായത്. ബിജെപി അധികാരത്തില്‍ വന്നാല്‍ കേരള മുഖ്യമന്ത്രിയാവുന്നതില്‍ എതിര്‍പ്പില്ലെന്ന് അദ്ദേഹം വ്യക്തമാക്കിയിരുന്നു. കേരളത്തില്‍ ബിജെപിയെ ജയിപ്പിക്കുന്നതിനാണ് മുന്‍ഗണനയെന്നും സംസ്ഥാനത്തിന്റെ ക്ഷേമത്തിനുവേണ്ടി പ്രയത്‌നിക്കുമെന്നും ഇ ശ്രീധരന്‍ പറഞ്ഞു.
അതേസമയം, കേരളത്തില്‍ ലവ് ജിഹാദുണ്ടെന്ന വിവാദപരാമര്‍ശവും ഇ ശ്രീധരന്‍ നടത്തിയിരുന്നു. കേരളത്തില്‍ ലവ് ജിഹാദ് നടക്കുന്നത് കാണുന്നുണ്ട്,ഹിന്ദുക്കളെ തന്ത്രത്തില്‍ വീഴ്ത്തി അവരെ വിവാഹം കഴിക്കുന്നത് എങ്ങനെയെന്നും അവര്‍ അനുവഭിക്കുന്നത് എന്താണെന്നും... ഹിന്ദുക്കള്‍ മാത്രമല്ല, മുസ്ലീം ക്രിസ്ത്യന്‍ പെണ്‍കുട്ടികളും തന്ത്രപരമായി വിവാഹം ചെയ്യപ്പെടുന്നുണ്ട്. അത്തരം കാര്യങ്ങള്‍ തീര്‍ച്ചയായും എതിര്‍ക്കുക തന്നെ ചെയ്യുമെന്നും ഇ ശ്രീധരന്‍ പറഞ്ഞു.
