ഡല്ഹി: ചലചിത്രപ്രവര്ത്തകരായ അനുരാഗ് കശ്യപിന്റെയും തപ്സി പന്നുവിന്റെയും വീടുകളില് നടന്ന ആദായനികുതി വകുപ്പ് റെയ്ഡില് കേന്ദ്രസര്ക്കാരിനെ വിമര്ശിച്ച് ശിവസേന. വിവാദ കാര്ഷിക നിയമങ്ങള്ക്കെതിരെ പോരാടുന്ന കര്ഷകരെ അനുകൂലിച്ചതുകൊണ്ടാണ് ഇരുവര്ക്കും കേന്ദ്രസര്ക്കാരിന്റെ നടപടികളെ നേരിടേണ്ടിവരുന്നതെന്ന് ശിവസേന പറഞ്ഞു. പാര്ട്ടി മുഖപത്രമായ സാമനയുടെ എഡിറ്റോറിയലിലാണ് ശിവസേന കേന്ദ്രസര്ക്കാരിനെ വിമര്ശിക്കുന്നത്.
പരിസ്ഥിതി പ്രവര്ത്തക ദിഷ രവിയുടെ അറസ്റ്റും നടി ദീപിക പദുക്കോണിനെതിരായ മോശം പ്രചാരണങ്ങളുമെല്ലാം അന്താരാഷ്ട്ര തലത്തില് രാജ്യത്തിന്റെ പ്രതിച്ഛായയ്ക്ക് മങ്ങലേല്പ്പിക്കുന്നവയാണെന്നും ശിവസേന വ്യക്തമാക്കി. ബോളിവൂഡ് താരങ്ങളില് ഇവര് രണ്ടുപേരും മാത്രമല്ല നിയമ ലംഘനങ്ങള് നടത്തിയിട്ടുള്ളത് എന്നാല് കേന്ദ്രസര്ക്കാരിനെതിരെ സംസാരിച്ചതിനാലാണ് ഇരുവരെയും അന്വേഷണ ഏജന്സികള് വേട്ടയാടുന്നത്. ജെഎന്യു സര്വകലാശാലയിലെ വിദ്യാര്ത്ഥികള്ക്ക് ഐക്യദാര്ഢ്യം പ്രഖ്യാപിച്ചതിനുപിന്നാലെയാണ്കേന്ദ്ര സര്ക്കാര് ദീപിക പദുക്കോണിനെതിരെ തിരിഞ്ഞത്.
അനുരാഗ് കശ്യപ്, തപ്സി പന്നു, വികാസ് ബഹല്, മധു മന്തേന തുടങ്ങിയ ചലചിത്രപ്രവര്ക്കകരുടെ ഓഫീസുകളിലും വീടുകളിലും ബുധനാഴ്ച്ചയാണ് ആദായനികുതി വകുപ്പ് റെയ്ഡ് നടന്നത്. അനുരാഗിന്റെയും തപ്സിയുടെയും വരുമാനത്തില് പൊരുത്തക്കേടും കൃത്രിമത്വവും കണ്ടെത്തിയതായി അധികൃതര് പറഞ്ഞു.
