കൊല്ക്കത്ത: പശ്ചിമബംഗാളില് കിസാന് മഹാപഞ്ചായത്ത് നടത്താനൊരുങ്ങി കര്ഷകനേതാവ് രാകേഷ് ടികായത്ത്. നിയമസഭാ തെരഞ്ഞെടുപ്പിനോടനുബന്ധിച്ച് തൃണമൂല് കോണ്ഗ്രസും ബിജെപിയും തമ്മില് ശക്തമായ പോരാട്ടം നടക്കുന്നതിനിടെയാണ് രാകേഷ് ടികായത്തിന്റെ പശ്ചിമബംഗാള് സന്ദര്ശനം. മുഖ്യമന്ത്രി മമത ബാനര്ജിയും സുവേന്ദു അധികാരിയും തമ്മില് ശക്തമായ മത്സരം നടക്കുന്ന നന്ദിഗ്രാമിലാണ് രാകേഷ് ടികായത്ത് മഹാപഞ്ചായത്ത് സംഘടിപ്പിക്കുന്നത്.
നന്ദിഗ്രാമിലും കൊല്ക്കത്തയിലും മഹാപഞ്ചായത്തുകള് സംഘടിപ്പിക്കുമെന്നും താന് വോട്ടുചോദിക്കാനല്ല ബംഗാളിലേക്ക് പോകുന്നതെന്നും രാകേഷ് ടികായത്ത് വ്യക്തമാക്കിയിരുന്നു. കഴിഞ്ഞ ദിവസം, സര്ക്കാര് കൊല്ക്കത്തയിലാണ് അതുകൊണ്ട് കര്ഷകരും കൊല്ക്കത്തയിലേക്ക് പോവുകയാണെന്ന് രാകേഷ് ടികായത്ത് പ്രഖ്യാപിച്ചിരുന്നു. കര്ഷകരെ ദ്രോഹിക്കുന്ന ബിജെപിക്ക് വോട്ടുചെയ്യരുതെന്നാവശ്യപ്പെട്ട് നിയമസഭാ തെരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിലും കര്ഷകര് പരിപാടികള് ആസൂത്രണം ചെയ്യുന്നുണ്ട്. ബിജെപിയെ തോല്പ്പിക്കാനായി കര്ഷകര് പ്രചാരണത്തിനിറങ്ങുമെന്നും സംയുക്ത കിസാന് മോര്ച്ച അറിയിച്ചു.
കര്ഷകര്ക്ക് ഒരു രാഷ്ട്രീയ പാര്ട്ടിയുമായും ബന്ധമില്ലെങ്കിലും അവര് ബിജെപിക്കെതിരാണെന്നുളളത് തൃണമൂല് കോണ്ഗ്രസിന് ഗുണം ചെയ്യും. കര്ഷകരുടെ പ്രതിഷേധം പശ്ചിമബംഗാളില് മാത്രം ഒതുങ്ങുന്നതല്ല. വരും ദിവസങ്ങളില് ഉത്തര്പ്രദേശ്, മധ്യപ്രദേശ്, ഒറീസ, കര്ണാടക തുടങ്ങിയ സംസ്ഥാനങ്ങളിലും കര്ഷകര് റാലി ആസൂത്രണം ചെയ്യുന്നുണ്ട്. ഇത്തരം പ്രതിഷേധങ്ങള് ബിജെപിയെ പ്രതികൂലമായി ബാധിക്കാനാണ് സാധ്യത.