തിരുവനന്തപുരം: അഹങ്കാരവും പിടിവാശിയും ആഢംബരവും ധൂര്ത്തും പിണറായി വിജയന്റെ മുഖമുദ്രയെന്ന് കോണ്ഗ്രസ് നേതാവ് എകെ ആന്റണി. ഇടതുപക്ഷത്തിന്റെ തുടര്ഭരണമുണ്ടായാല് അത് കേരളത്തില് നാശം വിതയ്ക്കുമെന്നും അദ്ദേഹം പറഞ്ഞു. തെരഞ്ഞെടുപ്പ് അടുത്തപ്പോള് അവരുടെ ഭാഷയിലും ശൈലിയിലും മാറ്റങ്ങള് കാണുന്നുണ്ട് എന്നാല് ഒരു നിമിഷം എല്ലാവരും കഴിഞ്ഞ അഞ്ചു വര്ഷത്തെ പിണറായി ഭരണത്തെക്കുറിച്ച് ആലോചിക്കണമെന്നും ആന്റണി പറഞ്ഞു.
ശബരിമല വിഷയത്തില് പിണറായി വിജയന് സര്ക്കാര് എടുത്ത നിലപാട് പിണറായി എത്ര മാറ്റിപ്പറഞ്ഞാലും വിശ്വാസികള് മറക്കില്ല. യുവതീപ്രവേശനം സംബന്ധിച്ച് സുപ്രീംകോടതിയുടെ വിധിപ്പകര്പ്പ് കിട്ടുന്നതിനുമുന്പ് തന്നെ സ്ത്രീകളെ പ്രവേശിപ്പിക്കാന് സര്ക്കാര് ശ്രമിച്ചു. വിധി നടപ്പാക്കരുതെന്നും വിശ്വാസികളുടെ സംഘടനകളുമായി ചര്ച്ച നടത്തണമെന്നും പ്രതിപക്ഷം ആവശ്യപ്പെട്ടിരുന്നു. എന്നാല് നവോത്ഥാനമാണ്, കോടതി വിധി നടപ്പിലാക്കുകയാണ് എന്നൊക്കെയാണ് മുഖ്യമന്ത്രി പറഞ്ഞത്. ഇക്കാര്യത്തില് പിടിവാശി കാണിക്കേണ്ട ആവശ്യമുണ്ടായിരുന്നോ എന്നും എകെ ആന്റണി ചോദിച്ചു.
