ബുവനേശ്വര്: റോഡ് വീതി കൂട്ടുന്നതിന്റെ ഭാഗമായി കഴിഞ്ഞ പത്ത് വര്ഷത്തിനിടെ ഒഡീഷയില് മുറിച്ചുമാറ്റിയത് 1.85 കോടി മരങ്ങള്. മുറിച്ചുമാറ്റിയ മരങ്ങള്ക്ക് പകരം വച്ചുപിടിപ്പിച്ചത് വെറും 29 ലക്ഷം മരങ്ങളാണ്. 2010-നും 2020-നും ഇടയില് ദേശീയപാത വികസനത്തിനായി 1,85,00,748 മരങ്ങള് വെട്ടിമാറ്റിയതായി വനം പരിസ്ഥിതി മന്ത്രി ബിക്രം കേശാരി അരുഖ പറഞ്ഞു.
ദേശീയ പാതകളുടെയും സംസ്ഥാന പാതകളുടെയും വീതി കൂട്ടുന്നതിന്റെ ഭാഗമായി വനമേഖലകളിലും നിന്നും അല്ലാതെയും മരങ്ങള് മുറിച്ചുമാറ്റിയിട്ടുണ്ട്. 66. 17 കോടി രൂപ ചിലവഴിച്ചാണ് പിന്നീട് 29 ലക്ഷം മരങ്ങള് നട്ടുപിടിപ്പിച്ചതെന്നും ബിക്രം കേശാരി അരുഖ പറഞ്ഞു.
ഏതെങ്കിലും വികസന പദ്ധതികള്ക്കായി മരം മുറിക്കുകയാണെങ്കില് ഒരു മരത്തിനു പകരം രണ്ട് മരം നട്ടുപിടിപ്പിക്കണം. വനഭൂമിയില് നിന്നാണ് മരം മുറിക്കുന്നതെങ്കില് ഒന്നിനുപകരം പത്ത് മരങ്ങള് നട്ടുപിടിപ്പിക്കണമെന്നാണ് വന സംരക്ഷണ നിയമം അനുശാസിക്കുന്നത്. എന്നാല് ഒഡീഷയില് സംസ്ഥാന സര്ക്കാര് വെട്ടിമാറ്റിയ മരങ്ങളുടെ പതിനാറ് ശതമാനം മാത്രമാണ് നട്ടുപിടിപ്പിച്ചിട്ടുളളത്.