തിരുവനന്തപുരം: തന്റെ ജീവിത സാഹചര്യത്തെ അധിക്ഷേപിച്ച എഎം ആരിഫിന് മറുപടിയുമായി കായംകുളം യുഡിഎഫ് സ്ഥാനാര്‍ത്ഥി അരിത ബാബു. എഎം ആരിഫിന്റെ പരാമര്‍ശം തൊളിലാളികളെ അപമാനിക്കുന്നതാണ്. ഒരു ജനപ്രതിനിധിയില്‍ നിന്ന് ഇത്തരമൊരു പരാമര്‍ശമുണ്ടായത് വേദനാജനകമാണെന്നും അരിത പ്രതികരിച്ചു.
അരിതാ ബാബുവിനെതിരായ പരാമര്‍ശത്തില്‍ ആരിഫ് മാപ്പുപറയണമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. ആരിഫിന്റെ പരാമര്‍ശം വില കുറഞ്ഞതും അരിതയെ അധിക്ഷേപിക്കുന്നതുമാണെന്നും ചെന്നിത്തല കൂട്ടിച്ചേര്‍ത്തു.
ഇത് പാല്‍ സൊസൈറ്റിയിലേക്കുളള തെരഞ്ഞെടുപ്പല്ല. പ്രാരാബ്ദമാണ് മാനദണ്ഡമെങ്കില്‍ അതു പറയണം എന്ന സിപി ഐഎം നേതാവും എംപിയുമായ ആരിഫിന്റെ പരാമര്‍ശം വിവാദമായിരുന്നു.
കോണ്‍ഗ്രസ് സ്ഥാനാര്‍ത്ഥി പട്ടികയിലെ ഏറ്റവും പ്രായം കുറഞ്ഞ സ്ഥാനാര്‍ത്ഥിയാണ് അരിത ബാബു. നേരത്തെ അരിതയെ കറവക്കാരി എന്ന് വിളിച്ചുളള സൈബര്‍ ആക്രമണവും നടന്നിരുന്നു. എന്നാല്‍ കറവക്കാരി എന്നു വിളിക്കുന്നതില്‍ അഭിമാനമാണെന്നായിരുന്നു അരിതയുടെ പ്രതികരണം.
