തൃശൂര്‍: സംസ്ഥാനത്ത് വീണ്ടും കൊവിഡ് രോഗം വ്യാപിക്കുന്ന സാഹചര്യത്തില്‍ തൃശൂര്‍ പൂരം നടത്തുന്നതിനെതിരെ ആരോഗ്യവകുപ്പ് രംഗത്ത്. പൂരത്തിനെത്തുന്ന ആളുകളെ നിയന്ത്രിച്ചില്ലെങ്കില്‍ ഇരുപതിനായിരം പേരേങ്കിലും രോഗബാധിതരാവുകയും രണ്ടായിരം പേര്‍ക്ക് ജീവന്‍ നഷ്ടപ്പെടുന്ന സാഹചര്യമുണ്ടാവുമെന്നും തൃശുര്‍ ജില്ലാ മെഡിക്കല്‍ ഓഫീസര്‍ ഡോ. കെ ജെ റീന പറഞ്ഞു.
പൂരത്തിനെത്തുന്ന ആളുകളെ നിയന്ത്രിക്കണമെന്നും പൂരം സ്ഥിരം നടത്തുന്നതുപോലെ നടത്താനുളള തീരുമാനം സര്‍ക്കാര്‍ പുനപരിശോധിക്കണമെന്നും ആരോഗ്യവകുപ്പ് ആവശ്യപ്പെട്ടിട്ടുണ്ട്. അതേസമയം പൂരം നടത്തുന്നതില്‍ നിന്ന് മുന്നോട്ട് പോവില്ലെന്ന നിലപാടിലാണ് പാറമേക്കാവ് ദേവസ്വം. പൂരം നടത്താതിരിക്കാനായി ആരോഗ്യവകുപ്പ് ഊതിപ്പെരുപ്പിച്ച കണക്കാണ് നല്‍കുന്നതെന്നും ദേവസ്വം ഭാരവാഹികള്‍ ആരോപിച്ചു.
കഴിഞ്ഞ ദിവസം ആള്‍ക്കൂട്ടത്തെ നിയന്ത്രിച്ച് പൂരം നടത്തുമെന്ന് മന്ത്രി വിഎസ് സുനില്‍കുമാര്‍ പറഞ്ഞിരുന്നു. സംസ്ഥാനത്ത് ഇരുപത്തിനാല് മണിക്കൂറിനിടെ 6986 പേര്‍ക്കാണ് രോഗം സ്ഥിരീകരിച്ചത്.
