കോഴിക്കോട്: സംസ്ഥാനത്ത് കൊവിഡ് വ്യാപനം കൂടുന്ന സാഹചര്യത്തില് ഇതര സംസ്ഥാന തൊഴിലാളികള് മടങ്ങുന്നു. ശനി, ഞായര് എന്നീ ദിവസങ്ങളിലാണ് ഏറ്റവും കൂടുതല് തൊഴിലാളികള് മടങ്ങിയത്. കഴിഞ്ഞ ലോക്ഡൌണ് കാലത്ത് ചില ഇടങ്ങളില് തൊഴിലാളികള്ക്ക് ഭക്ഷണം പോലുമില്ലാതെ വിഷമിച്ചിരുന്നു, ഇത് ഭയന്നാണ് പലരും വീടുകളിലേക്ക് മടങ്ങി പോകുന്നത്.
കോഴിക്കോട് ജില്ലയില് പതിനായിരത്തിലധികം ഇതര സംസ്ഥാന തൊഴിലാളികള് പണി എടുക്കുന്നുണ്ട്. എന്നാല് ഇവരില് മുപ്പത് ശതമാനത്തിലധികം പേരും മടങ്ങി പോയെന്നാണ് ഹോട്ടല് ആന്ഡ് റാസ്റ്റോറന്റ് അസോസിയേഷന്റെ കണക്കുകള് വ്യക്തമാക്കുന്നത്.
റംസാന് പുറമേ കൊവിഡ് നിയന്ത്രണങ്ങള് കൂട്ടുകയും ചെയ്തത് ഹോട്ടല് മേഖലയിലെ കച്ചവടം കുറയാന് ഇടയാക്കിയിട്ടുണ്ട്. അതിനാല് പലര്ക്കും തൊഴില് നഷ്ടമാകുന്ന സാഹചര്യമാണ് നിലവില് ഉള്ളത്. കച്ചവടം കുറയുന്ന സാഹചര്യത്തില് തൊഴിലാളികള്ക്ക് ഭക്ഷണവും, താമസ സൗകര്യം നല്കി നിര്ത്താന് കഴിയാത്ത സാഹചര്യമാണെന്ന് ഹോട്ടല് ഉടമകളും പറയുന്നു.