തിരുവനന്തപുരം: സോളാര്‍ തട്ടിപ്പു കേസില്‍ സരിതാ എസ്. നായര്‍ അറസ്റ്റില്‍. തിരുവനന്തപുരത്ത് വച്ചാണ് സരിതയെ അറസ്റ്റ് ചെയ്തത്. സോളാര്‍ സാമ്പത്തിക തട്ടിപ്പുമായി ബന്ധപ്പെട്ട് കോഴിക്കോട് മജിസ്‌ട്രേറ്റ് കോടതി നിരന്തരം വാറണ്ടുകളയച്ചിട്ടും ഹാജരാകാത്തതിനാലാണ് അറസ്റ്റ്. കോഴിക്കോട് കസബ പൊലീസ് തിരുവനന്തപുരത്തെത്തിയാണ് സരിതയെ അറസ്റ്റ് ചെയ്തത്.
നേരത്തെ സോളാര്‍ തട്ടിപ്പ് കേസില്‍ ബിജു രാധാകൃഷ്ണന്റെയും സരിതയുടെയും ജാമ്യം കോഴിക്കോട് ജുഡീഷ്യല്‍ ഫസ്റ്റ് ക്ലാസ് കോടതി റദ്ദാക്കിയിരുന്നു. ഫെബ്രുവരി 25-ന് കോടതിയില്‍ ഹാജരാകണമെന്നായിരുന്നു കോടതി നിര്‍ദേശം.
കോഴിക്കോട് സ്വദേശിയായ അബ്ദുള്‍ മജീദിന്റെ വീട്ടിലും ഓഫീസിലും സോളാര്‍ പാനല്‍ സ്ഥാപിക്കാനായി 42 ലക്ഷം രൂപ വാങ്ങി വഞ്ചിച്ചുവെന്ന കേസിലാണ് സരിതയെ അറസ്റ്റ് ചെയ്തിരിക്കുന്നത്. കേസില്‍ ബിജു രാധാകൃഷ്ണന്‍ ഒന്നാംപ്രതിയും സരിതാ എസ് നായര്‍ രണ്ടാം പ്രതിയുമാണ്.
