ഡല്ഹി: രാജ്യത്ത് കൊവിഡ് പ്രതിസന്ധി രൂക്ഷമാവാന് കാരണം കേന്ദ്രസര്ക്കാരിന്റെ അശ്രദ്ധയാണെന്ന് കര്ഷക നേതാവ് രാകേഷ് ടികായത്ത്. രാമക്ഷേത്രനിര്മ്മാണത്തിനായി സംഭാവന ചോദിക്കുന്ന സര്ക്കാര് ആശുപത്രികള് നിര്മ്മിക്കാനാണ് സംഭാവനകള് ചോദിക്കേണ്ടിയിരുന്നത്. ക്ഷേത്രങ്ങളേക്കാള് ആശുപത്രികള്ക്കാണ് പ്രാധാന്യം നല്കേണ്ടതെന്നും രാകേഷ് ടികായത്ത് പറഞ്ഞു. ഡല്ഹിയില് പ്രതിഷേധിക്കുന്ന കര്ഷകര്ക്ക് രോഗം സ്ഥിരീകരിച്ചാല് പൂര്ണ ഉത്തരവാദിത്വം സര്ക്കാരിന്റേതായിരിക്കും. കൊവിഡിന്റെ പേരു പറഞ്ഞ് കര്ഷകരുടെ സമരത്തെ ഇല്ലാതാക്കാനാണ് കേന്ദ്രസര്ക്കാരിന്റെ ശ്രമം. രാജ്യത്തുടനീളം കൊവിഡ് വ്യാപിച്ചുകൊണ്ടിരിക്കുന്നതിനും കാരണം കര്ഷകരാണെന്ന് സര്ക്കാര് പറയുമോ എന്ന് രാകേഷ് ടികായത്ത് ചോദിച്ചു.
കര്ഷകരുടെ പ്രതിഷേധവും കൊവിഡ് വ്യാപനവും തമ്മില് യാതൊരു ബന്ധവുമില്ല. കര്ഷകപ്രക്ഷോഭത്തില് പങ്കെടുക്കുന്നവരേക്കാള് കൂടുതല് ആളുകള് നരേന്ദ്രമോദിയുടെ റാലികളിലുണ്ടാവാറുണ്ട്. എന്ത് സംഭവിച്ചാലും കര്ഷകരുടെ ആവശ്യങ്ങള് നിറവേറ്റാതെ പ്രതിഷേധത്തില് നിന്ന് ആരും പിന്നോട്ട് പോവില്ലെന്ന് രാകേഷ് ടികായത്ത് പറഞ്ഞു.
കേന്ദ്രസര്ക്കാരിന്റെ വിവാദ കാര്ഷിക നിയമങ്ങളില് പ്രതിഷേധിച്ച് ലക്ഷക്കണക്കിന് കര്ഷകരാണ് ഡല്ഹി അതിര്ത്തികളില് പ്രതിഷേധിക്കുന്നത്. സമരം ആരംഭിച്ച് അഞ്ച് മാസം പിന്നിടുമ്പോഴും സര്ക്കാരിന്റെ ഭാഗത്തുനിന്ന് അനുകൂല പ്രതികരണങ്ങളൊന്നും തന്നെ ഉണ്ടായിട്ടില്ല. സമരം അവസാനിപ്പിക്കാനായി സര്ക്കാര് മുന്നോട്ട് വച്ച ഉപാധികളെല്ലാം നിരസിച്ച കര്ഷകര് വിവാദ നിയമങ്ങള് പിന്വലിക്കണം എന്ന ആവശ്യത്തില് ഉറച്ചുനില്ക്കുകയാണ്.
