തിരുവനന്തപുരം: സംസ്ഥാനത്ത് ഇന്ന് അതി തീവ്രമഴക്ക് സാധ്യതയുള്ളതായി കാലാവസ്ഥാ നീരിക്ഷണ കേന്ദ്രം അറിയിച്ചു. തെക്ക്-കിഴക്ക് അറബി കടലില്‍ രൂപപ്പെട്ട ന്യൂനമര്‍ദ്ദം ഇന്ന് ശക്തിപ്പെടുമെന്നാണ് വിലയിരുത്തല്‍. മഴ ശക്തമാകുന്ന സാഹചര്യത്തില്‍ നാളെ തിരുവനന്തപുരം, കൊല്ലം, പത്തനംതിട്ട എന്നീ ജില്ലകളില്‍ റെഡ് അലര്‍ട്ട് പ്രഖ്യാപിച്ചു. ഇന്ന് ആലപ്പുഴ മുതല്‍ വയനാട് വരേയുള്ള ഏഴു ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. സംസ്ഥാനത്ത് ചൊവ്വാഴ്ചവരെ ശക്തമായ തുടരും.
വരുംദിവസങ്ങളില്‍ ന്യൂനമര്‍ദ്ദം ശക്തിപ്പെട്ട് ടൗടേ ചുഴലിക്കാറ്റായി മാറും. കേരള തീരത്തിനടുത്തൂടെയാണ് ചുഴലിക്കാറ്റിന്‍റെ സഞ്ചാരപഥം എന്നുള്ളതിനാല്‍ കടല്‍ പ്രക്ഷുബ്ദമാകുമെന്നും, അതിനാല്‍ ആരും കടലില്‍ പോകരുതെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്. തീരമേഖലയില്‍ കടല്‍ക്ഷോഭം രൂക്ഷമായ സാഹചര്യത്തില്‍ കോഴിക്കോട്, തിരുവനന്തപുരം, ആലപ്പുഴ ജില്ലകളില്‍ കൺട്രോൾ റൂം തുറന്ന് പ്രവര്‍ത്തിക്കുന്നുണ്ട്.
അടുത്ത മണിക്കൂറില്‍ തിരുവനന്തപുരം, കോട്ടയം, എറണാകുളം ജില്ലകളില്‍ 40 കി.മി വേഗത്തില്‍ കാറ്റ് വീശിയടിക്കാന്‍ സാധ്യതയുണ്ട്. അതോടൊപ്പം, ശക്തമായ ഇടിമിന്നലിലും, സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കണമെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്.
