ആള്‍ക്കൂട്ടം ഒഴിവാക്കി വെര്‍ച്വലായി സത്യപ്രതിജ്ഞാ ചടങ്ങ് നടത്തണമെന്ന് പാര്‍വ്വതി തിരുവോത്ത്. സത്യപ്രതിജ്ഞക്കായി 500 പേര്‍ എന്നത് അത്ര കൂടുതലല്ല എന്നാണ് മുഖ്യമന്ത്രി പറഞ്ഞത്. എന്നാല്‍ കൊവിഡ് കേസുകള്‍ ഇപ്പോഴും വര്‍ദ്ധിച്ചുവരികയാണ്. നമ്മള്‍ കൊവിഡ് പ്രതിരോധത്തിന്റെ അവസാന ഘട്ടത്തിലല്ലതാനും. ഇതെല്ലാം കണക്കിലെടുക്കുമ്പോള്‍ തെറ്റായ നടപടിയാണിത്, പ്രത്യേകിച്ചും മറ്റൊരു മാതൃകയ്ക്ക് അവസരമുള്ളപ്പോള്‍ എന്നായിരുന്നു പാര്‍വ്വതിയുടെ പ്രതികരണം.
കൊവിഡ് പ്രതിരോധത്തിനായും മുന്‍നിര കൊവിഡ് പ്രവര്‍ത്തകര്‍ക്കായും സംസ്ഥാന സര്‍ക്കാര്‍ ചെയ്തുകൊണ്ടിരിക്കുന്നതെല്ലാം നല്ല കാര്യങ്ങളാണ്. അതിപ്പോഴും സര്‍ക്കാര്‍ ഉത്തരവാദിത്തത്തോടെ തുടരുകയും ചെയ്യുന്നു. അതുകൊണ്ടാണ് ഇത് എല്ലാവരെയും ഞെട്ടിക്കുന്നതെന്നും, അതുകൊണ്ടാണ് ഇത് അംഗീകരിക്കാന്‍ കഴിയാത്തതെന്നും പാര്‍വ്വതി പറയുന്നു.
കൊവിഡ് വ്യാപനത്തിന്‍റെ പശ്ചാത്തലത്തില്‍ രണ്ടാം പിണറായി സര്ക്കാരിന്റെ സത്യപ്രതിജ്ഞ ഓണ്‍ലൈനായി നടത്തണമെന്ന ആവശ്യം സമൂഹ മാധ്യമങ്ങളില്‍ സജീവമായി ചര്‍ച്ചചെയ്യപ്പെടുന്നുണ്ട്. മെയ് 20ന് തിരുവനന്തപുരം സെന്‍ട്രല്‍ സ്റ്റേഡിയത്തില്‍ വച്ചാണ് രണ്ടാം പിണറായി സര്ക്കാരിന്റെ സത്യപ്രതിജ്ഞ നടക്കുന്നത്. 500 പേര്‍ എന്നത് ഇത്തരം കാര്യങ്ങള്‍ക്ക് വലിയ സംഖ്യ അല്ലെന്നായിരുന്നു മുഖ്യമന്ത്രിയുടെ ന്യായീകരണം.
തിരുവനന്തപുരത്ത് ട്രിപ്പിള്‍ ലോക്ക് ഡൗണ്‍ ഏര്‍പ്പെടുത്തിയ സാഹചര്യത്തില്‍ സത്യപ്രതിജ്ഞാ ചടങ്ങ് നടത്താന്‍ അനുവദിക്കരുതെന്ന് ആവശ്യ'പ്പെട്ടുകൊണ്ട് ഹൈകോടതിയില്‍ ഹര്‍ജി സമര്‍പ്പിക്കപ്പെട്ടിട്ടുണ്ട്. അതെസമയം, കൊവിഡ് രൂക്ഷമാകുന്ന സാഹചര്യത്തില്‍ യുഡിഎഫ് എംഎല്‍എ-മാര്‍ സത്യപ്രതിജ്ഞാ ചടങ്ങില്‍ വെര്‍ച്വലായേ പങ്കെടുക്കൂ എന്ന് യുഡിഎഫ് കണ്‍വീനര്‍ എം. എം. ഹസന്‍ പറഞ്ഞു.
