തിരുവനന്തപുരം: കൊവിഡ്‌ രൂക്ഷമാകുന്ന സാഹചര്യത്തില്‍ നിര്‍മ്മാണ തൊഴിലാളി ക്ഷേമനിധി ധനസഹായത്തിന് അപേക്ഷിക്കാം. നിര്‍മ്മാണ തൊഴിലാളി ക്ഷേമനിധി ബോര്‍ഡില്‍ അംഗങ്ങളായ തൊഴിലാളികള്‍ക്ക് 1000 രൂപ വീതമാണ് ധനസഹായം ലഭിക്കുക. 2020 ല്‍ ധനസഹായം ലഭിച്ച തൊഴിലാളികള്‍ക്ക് പുതുതായി അപേക്ഷ സമര്‍പ്പിക്കാതെ തന്നെ അവരവരുടെ ബാങ്ക് അക്കൗണ്ടുകളില്‍ ധനസഹായം ലഭിക്കും.
2020 ല്‍ ധനസഹായം ലഭിക്കാത്ത തൊഴിലാളികളും പുതുതായി ധനസഹായത്തിന് അപേക്ഷിക്കുന്നവരും നിശ്ചിത മാതൃകയില്‍ അപേക്ഷ തയ്യാറാക്കി അതോടൊപ്പം ആധാര്‍ കാര്‍ഡ്, ബാങ്ക് അക്കൗണ്ട് കോപ്പി, അസ്സല്‍ ക്ഷേമനിധി ഐ ഡി കാര്‍ഡ് എന്നിവ സഹിതം അപേക്ഷിച്ചാല്‍ ഈ വര്‍ഷത്തെ ധനസഹായം ലഭിക്കും. അപേക്ഷ ലോക്ഡൗണിന് ശേഷം ജില്ലാ ഓഫീസില്‍ സ്വീകരിക്കുന്നതാണ്.
ഇന്നലെ മാത്രം കേരളത്തില്‍ കൊവിഡ്‌ സ്ഥിരീകരിച്ചിരിക്കുന്നത് 32762 ആളുകള്‍ക്കാണ്. 48413 പേര്‍ രോഗമുക്തരാവുകയും ചെയ്തു. ഇന്നലെ മാത്രം സംസ്ഥാനത്ത് കൊവിഡ്‌ ബാധിച്ച് മരിച്ചത് 112 ആളുകളാണ്. സംസ്ഥാനത്ത് ഇതുവരെ ആകെ മരണം 6724 ആണ്. കൊവിഡ്‌ മുക്തരായാല്‍ 3 മാസത്തിന് ശേഷം മാത്രമേ വാക്സിന്‍ സ്വീകരിക്കാന്‍ പാടുള്ളുവെന്ന് കേന്ദ്ര ആരോഗ്യ മന്ത്രാലയം വ്യക്തമാക്കി.
