ഡല്‍ഹി: ഇന്ത്യയിലെ കൊവിഡ് രോഗികള്‍ക്കിടയില്‍ ബ്ലാക്ക് ഫംഗസ് രോഗം പടര്‍ന്നുപിടിക്കുന്ന വാര്‍ത്തകളാണ് നാം ദിവസവും കാണുന്നത്. കൊവിഡ് ബാധിച്ചവരില്‍ മാത്രം വരുന്ന ഫംഗസ് ബാധയാണിതെന്ന തെറ്റിദ്ധാരണയുണ്ട്. എന്നാല്‍, കൊവിഡ് ബാധിച്ചിട്ടില്ലാത്തവരിലും ബ്ലാക്ക് ഫംഗസ് ബാധിക്കാമെന്നും പ്രമേഹരോഗികള്‍ കൂടുതല്‍ ജാഗ്രത പാലിക്കണമെന്നും മുന്നറിയിപ്പ് നല്‍കുകയാണ് വിദഗ്ദര്‍.
കൊവിഡ് വരുന്നതിനു മുന്‍പ് തന്നെ ഉണ്ടായിരുന്ന അണുബാധയാണ് ബ്ലാക്ക് ഫംഗസ്. ബ്ലാക്ക് ഫംഗസിനെക്കുറിച്ച് മെഡിക്കല്‍ വിദ്യാര്‍ത്ഥികളെ പഠിപ്പിക്കുന്നത് അവ കടുത്ത പ്രമേഹരോഗികളിലാണ് ഉണ്ടാകുന്നതാണെന്നാണ്. കുട്ടികള്‍ക്കും മുതിര്‍ന്നവര്‍ക്കും പ്രായഭേദമന്യേ രോഗം ബാധിക്കും. പ്രമേഹത്തോടൊപ്പം ന്യൂമോണിയപോലുളള മറ്റ് രോഗങ്ങളുളളവരില്‍ സ്ഥിതി വഷളാവാന്‍ സാധ്യതയുണ്ട്. കൊവിഡ് ബാധിച്ചവരില്‍ ബ്ലാക്ക് ഫംഗസ് ബാധിക്കുമ്പോള്‍ രോഗം മൂര്‍ച്ഛിക്കുകയും അത് മരണത്തിലേക്ക് നയിക്കുകയും ചെയ്യുകയാണെന്ന് നീതി ആയോഗ് അംഗം വികെ പോള്‍ പറഞ്ഞു.
ആരോഗ്യവാന്മാരായ ആളുകള്‍ ഈ അണുബാധയെക്കുറിച്ച് ആശങ്കപ്പെടേണ്ടതില്ലെന്ന് എയിംസിലെ ഡോ. നിഖില്‍ ടാണ്ഡന്‍ പറയുന്നു. പ്രതിരോധശേഷി കുറഞ്ഞവരിലാണ് അപകടസാധ്യത കൂടുതല്‍. കൊവിഡിന്റെ രണ്ടാം തരംഗം ആദ്യത്തെ വരവിനേക്കാള്‍ കൂടുതല്‍ പ്രതിരോധ ശേഷിയെ ബാധിച്ചിരിക്കാം. അതുകൊണ്ടാണ് കൊവിഡ് രോഗികളില്‍ ബ്ലാക്ക് ഫംഗസ് അണുബാധ കൂടുതലായി റിപ്പോര്ട്ട് ചെയ്യുന്നത്. ഇതിനുപുറമേ സ്റ്റിറോയിഡുകളുടെ ഉപയോഗവും രണ്ടാം തരംഗത്തില്‍ വ്യാപകമായിട്ടുണ്ട്. ഇതെല്ലാമാണ് ബ്ലാക്ക് ഫംഗസ് പടരാനിടയാക്കിയത്. എന്നാല്‍ കൂടുതല്‍ വിശദമായ പഠനങ്ങള്‍ നടത്താതെ കൃത്യമായി ഒന്നും പറയാന്‍ സാധിക്കില്ലെന്നും നിഖില്‍ ടാണ്ഡന്‍ കൂട്ടിച്ചേര്‍ത്തു.
കഴിഞ്ഞ ദിവസം ഹരിയാനയില്‍ 398 ബ്ലാക്ക് ഫംഗസ് കേസുകളാണ് റിപ്പോര്ട്ട് ചെയ്തത്. ഗുരുഗ്രാമില്‍ 147 കേസുകളും റിപ്പോര്ട്ട് ചെയ്തു. കേരളത്തില്‍ നാല് മരണങ്ങളാണ് ബ്ലാക്ക് ഫംഗസ് അണുബാധ മൂലം മരണപ്പെട്ടത്. ഉത്തരാഖണ്ഡില്‍ ബ്ലാക്ക് ഫംഗസിനെ പകര്‍ച്ചവ്യാദിയായി പ്രഖ്യാപിച്ചുകഴിഞ്ഞു. മധ്യപ്രദേശിലെ ജബല്‍പൂരില്‍ 'വൈറ്റ് ഫംഗസ്' സ്ഥിരീകരിച്ചതായും റിപ്പോര്‍ട്ടുകളുണ്ട്.
