ഡല്‍ഹി: എയര്‍ ഇന്ത്യയുടെ നൂറുശതമാനം ഓഹരികള്‍ വിറ്റഴിക്കാന്‍ തീരുമാനിച്ച് കേന്ദ്ര സര്‍ക്കാര്‍ ക്ഷണിച്ച സമ്മത പത്രത്തിന്‍റെ അവസാന തീയതി ഇന്നവസാനിക്കില്ല.വാങ്ങാന്‍ താല്‍പ്പര്യപ്പെട്ട് ഇതുവരെ ആരും വരാത്തതിനാല്‍ താല്പ്പര്യ പത്രം സ്വീകരിക്കുന്ന തീയതി ഈ മാസം മുപ്പത് വരെ നീട്ടാന്‍ കഴിഞ്ഞ ദിവസം ചേര്‍ന്ന കേന്ദ്ര മന്ത്രിസഭായോഗം തീരുമാനിച്ചിരുന്നു.
കേന്ദ്ര ആഭ്യന്തര മന്ത്രി അമിത്ഷായുടെ നേതൃത്വത്തിലാണ് എയര്‍ ഇന്ത്യയുടെ വില്‍പ്പന നടത്തുന്നത്. താല്പ്പര്യ പത്രം സമര്‍പ്പിക്കാന്‍ നിശ്ചയിച്ച അവസാനതിയതി ഇന്ന് (മാര്‍ച്ച്‌ 17) അവസാനിച്ചെങ്കിലും ആരും വരാത്തതിനാല്‍ തീയതി നീട്ടുകയാണുണ്ടായത്.
വാങ്ങുന്നവര്‍ എയര്‍ ഇന്ത്യയുടെ ഇരുപത്തി നാലായിരം കോടിയോളം വരുന്ന കടവും ഏറ്റെടുക്കണം. 2018-ല കമ്പനിയുടെ 76 ശതമാനം ഓഹരികള്‍ വില്‍ക്കാന്‍ ശ്രമിച്ചിരുന്നെങ്കിലും ആരും മുന്നോട്ടു വന്നിരുന്നില്ല. നിലവില്‍ ആറായിരം കോടി രൂപ നഷ്ടത്തിലുള്ള സ്ഥാപനമാണ്‌ എയര്‍ ഇന്ത്യ. അനുബന്ധ സ്ഥാപനങ്ങളായ എയര്‍ ഇന്ത്യാ എക്സ്പ്രസ്സിന്‍റെയും നൂറു ശതമാനം ഓഹരികളും വില്‍ക്കാനാണ് ഇപ്പോള്‍ സര്‍ക്കാരിന്‍റെ തീരുമാനം.
