ഡല്‍ഹി: വിവാദ കാര്‍ഷിക നിയമങ്ങള്‍ക്കെതിരായ കര്‍ഷകരുടെ സമരം ഏഴ് മാസം പിന്നിടുമ്പോള്‍ കര്‍ഷകര്‍ക്ക് ഐക്യദാര്‍ഢ്യം പ്രഖ്യാപിച്ച് രാഹുല്‍ ഗാന്ധി. 'ഇത് ലളിതമാണ്, ഞങ്ങള്‍ സത്യാഗ്രഹികളും അന്നദാതാക്കളുമായ കര്‍ഷകര്‍ക്കൊപ്പമാണ്' രാഹുല്‍ ട്വീറ്റ് ചെയ്തു. പ്രതിഷേധം ഏഴ് മാസം പിന്നിട്ടിട്ടും സര്‍ക്കാരിന്റെ ഭാഗത്തുനിന്ന് അനുകൂല പ്രതികരണങ്ങളൊന്നുമുണ്ടാവാത്തതിനാല്‍ വീണ്ടും ട്രാക്ടര്‍ റാലി നടത്താനൊരുങ്ങുകയാണ് കര്‍ഷകര്‍. ഭാരതീയ കിസാന്‍ യൂണിയന്‍ ആസ്ഥാനമായ സിസോളിയില്‍ നിന്ന് നൂറുകണക്കിന് ട്രാക്ടറുകള്‍ ഗാസിയാബാദിലെത്തിയിട്ടുണ്ട്. കര്‍ഷകരുടെ റാലി കണക്കിലെടുത്ത് കേന്ദ്രസര്‍ക്കാര്‍ തലസ്ഥാനത്ത് സുരക്ഷ വര്‍ധിപ്പിച്ചിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നിയമങ്ങള്‍ പിന്‍വലിക്കാനോ കര്‍ഷകരുടെ ആവശ്യങ്ങള്‍ കേള്‍ക്കാനോ കേന്ദ്രസര്‍ക്കാര്‍ തയാറാവാത്തതിനാല്‍ പ്രതിഷേധം ശക്തമാക്കാന്‍ പോവുകയാണെന്ന് കര്‍ഷക നേതാവ് രാകേഷ് ടികായത്ത് പറഞ്ഞു. 2020 നവംബര്‍ 26-നാണ് കേന്ദ്രസര്‍ക്കാരിന്റെ വിവാദ കാര്‍ഷിക നിയമങ്ങള്‍ക്കെതിരായി രാജ്യത്തെ ലക്ഷക്കണക്കിന് കര്‍ഷകര്‍ പ്രതിഷേധം ആരംഭിച്ചത്. തുടക്കത്തില്‍ പൊലീസിനെ ഉപയോഗിച്ച് കര്‍ഷക പ്രതിഷേധത്തെ അടിച്ചമര്‍ത്താനാണ് സര്‍ക്കാര്‍ ശ്രമിച്ചത്. അത് ഫലം കാണാതിരുന്നതോടെ കര്‍ഷകര്‍ ഖാലിസ്ഥാനികളും തീവ്രവാദികളുമാണെന്ന് പ്രചരിപ്പിച്ചു.
കര്‍ഷകരുടെ പ്രതിഷേധം ലോകശ്രദ്ധ നേടിയപ്പോള്‍ കേന്ദ്രം കര്‍ഷകസംഘടനകളുമായി ഉപാധി ചര്‍ച്ചകള്‍ നടത്തി. നിയമങ്ങള്‍ 18 മാസത്തേക്ക് നടപ്പാക്കാതിരിക്കാം, നിയമങ്ങളില്‍ ഭേദഗതികളുണ്ടാക്കാം തുടങ്ങി നിരവധി ഉപാധികളാണ് ബിജെപി സര്‍ക്കാര്‍ മുന്നോട്ടുവച്ചത്. എന്നാല്‍ നിയമങ്ങള്‍ പിന്‍വലിക്കുകയല്ലാതെ മറ്റൊരു ഒത്തുതീര്‍പ്പിനും തയാറല്ലെന്നതായിരുന്നു കര്‍ഷകരുടെ നിലപാട്.
