ഡല്ഹി: വിവാദ കാര്ഷിക നിയമങ്ങള്ക്കെതിരായ പ്രതിഷേധം ശക്തമാക്കാനൊരുങ്ങി കര്ഷകര്. അടുത്ത മാസം കര്ഷകരുടെ നേതൃത്വത്തില് കൂറ്റന് ട്രാക്ടര് റാലി നടത്തുമെന്ന് ഭാരതീയ കിസാന് യൂണിയന് നേതാവ് രാകേഷ് ടികായത്ത് പറഞ്ഞു. വലിയ വിപ്ലവം വരാന് പോകുന്നുവെന്നാണ് അദ്ദേഹം ട്രാക്ടര് റാലിയെ വിശേഷിപ്പിച്ചത്. ഡല്ഹിയിലേക്ക് പ്രവേശിക്കാനായി വേണ്ടിവന്നാല് റഷ്യന് ട്രാക്ടറുകള് ഉപയോഗിക്കുമെന്നും ടികായത്ത് പറഞ്ഞു.
'ഇത് ഒരു തരം ഓട്ടോമാറ്റിക് ട്രാക്ടറാണ്. ഗിയറിലിട്ടുകഴിഞ്ഞാല് അതിനെ നിര്ത്താന് സാധിക്കില്ല. മുന്നില് കാണുന്നതിനെയെല്ലാം അത് ചതച്ചരച്ച് മുന്നോട്ടുപോകും. ആവശ്യം വരികയാണെങ്കില് ഡല്ഹിയിലേക്ക് പ്രവേശിക്കാനായി ഈ ട്രാക്ടറുകള് ഉപയോഗിക്കും. നിലവില് ഞങ്ങള് ട്രാക്ടറുകളൊന്നും പ്രതിഷേധിക്കാനായി ഉപയോഗിക്കുന്നില്ലെങ്കിലും ഇത്തരത്തിലുളള പലതരം ട്രാക്ടറുകള് ഞങ്ങളുടെ പക്കലുണ്ട്' രാകേഷ് ടികായത്ത് പറഞ്ഞു.
2020 നവംബര് 26-നാണ് കേന്ദ്രസര്ക്കാരിന്റെ വിവാദ കാര്ഷിക നിയമങ്ങള്ക്കെതിരായി രാജ്യത്തെ ലക്ഷക്കണക്കിന് കര്ഷകര് പ്രതിഷേധം ആരംഭിച്ചത്. തുടക്കത്തില് പൊലീസിനെ ഉപയോഗിച്ച് കര്ഷക പ്രതിഷേധത്തെ അടിച്ചമര്ത്താനാണ് സര്ക്കാര് ശ്രമിച്ചത്. അത് ഫലം കാണാതിരുന്നതോടെ കര്ഷകര് ഖാലിസ്ഥാനികളെന്നും തീവ്രവാദികളെന്നും രാജ്യദ്രോഹികളെന്നുമൊക്കെ മുദ്രകുത്താന് ശ്രമങ്ങളും നടന്നിരുന്നു.
കര്ഷകരുടെ പ്രതിഷേധം ലോകശ്രദ്ധ നേടിയപ്പോള് കേന്ദ്രം കര്ഷകസംഘടനകളുമായി ചര്ച്ച നടത്താന് . നിയമങ്ങള് 18 മാസത്തേക്ക് നടപ്പാക്കാതിരിക്കാം, നിയമങ്ങളില് ഭേദഗതികളുണ്ടാക്കാം തുടങ്ങി നിരവധി ഉപാധികളാണ് ബിജെപി സര്ക്കാര് മുന്നോട്ടുവച്ചത്. എന്നാല് നിയമങ്ങള് പിന്വലിക്കുകയല്ലാതെ മറ്റൊരു ഒത്തുതീര്പ്പിനും തയാറല്ലെന്നതാണ് കര്ഷകരുടെ നിലപാട്.