ചെന്നൈ: മത്സ്യത്തൊഴിലാളിയുടെ ചുമലില്‍ കയറി വിവാദത്തിലായി തമിഴ്‌നാട് ഫിഷറീസ് മന്ത്രി അനിത ആര്‍ രാധാകൃഷ്ണന്‍. തീരദേശ ശോഷണത്തെ സംബന്ധിച്ച പരാതികള്‍ പരിശോധിക്കാനായി എത്തിയ മന്ത്രി വെളളത്തിലിറങ്ങുന്നത് ഒഴിവാക്കാനായാണ് മത്സ്യതൊഴിലാളിയുടെ ചുമലില്‍ കയറി കരയ്‌ക്കെത്തിയത്. തമിഴ്‌നാട്ടിലെ തിരുവളളുവര്‍ ജില്ലയിലാണ് സംഭവം.
ബോട്ടില്‍ യാത്ര ചെയ്‌തെത്തിയ മന്ത്രിക്ക് കരയിലേക്ക് കയറാനായി കുറച്ച് വെളളത്തിലൂടെ നടക്കണമായിരുന്നു എന്നാല്‍ മന്ത്രി അതിന് തയാറായില്ല. തുടര്‍ന്ന് അടുത്തുണ്ടായിരുന്ന മത്സ്യത്തൊഴിലാളി മന്ത്രിയെ എടുത്ത് കരയിലെത്തിക്കുകയായിരുന്നു എന്നാണ് തമിഴ് മാധ്യമങ്ങള്‍ റിപ്പോര്ട്ട് ചെയ്യുന്നത്. വീഡിയോ വൈറലായതോടെ മന്ത്രി വിവാദത്തിലായിരിക്കുകയാണ്.
എന്നാല്‍ വെളളത്തിലിറങ്ങാന്‍ മടിച്ചാണ് ഇത്തരത്തില്‍ പ്രവര്‍ത്തിച്ചതെന്ന റിപ്പോര്‍ട്ടുകള്‍ മന്ത്രി നിഷേധിച്ചു. തൊഴിലാളികള്‍ തന്നോട് സ്‌നേഹം പ്രകടിപ്പിക്കുകയായിരുന്നു. തനിക്ക് വെളളത്തിലിറങ്ങാന്‍ ഒരു മടിയുമില്ലായിരുന്നു. കരയിലെത്തിയശേഷം മത്സ്യത്തൊഴിലാളികള്‍ തന്നെ കെട്ടിപ്പിടിക്കുകയും ഉമ്മ വയ്ക്കുകയുമെല്ലാം ചെയ്തു എന്ന് മന്ത്രി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മന്ത്രി വിശദീകരണം നല്‍കിയെങ്കിലും സമൂഹമാധ്യമങ്ങളില്‍ മന്ത്രിയുടെ പ്രവൃത്തിയെച്ചൊല്ലി രോഷം ആളിക്കത്തുകയാണ്. മന്ത്രി വിഐപി സംസ്‌കാരമാണ് കാണിക്കുന്നതെന്നാണ് പലരും കമന്റ് ചെയ്യുന്നത്.
