കല്പ്പറ്റ: വയനാട് ജില്ലയില് കനത്ത മഴ തുടരുന്നു. മഴ ശക്തിപ്പെട്ട സാഹചര്യത്തില് വാര്ഡ്തലത്തില് മുന്കരുതല് സ്വീകരിക്കാന് നിര്ദ്ദേശം. കാലവര്ഷം സംബന്ധിച്ച ഒരുക്കങ്ങള് വിലയിരുത്താന് ഓണ്ലൈനായി ചേര്ന്ന യോഗത്തിലാണ് നിര്ദ്ദേശം. മഴ തുടരുന്ന സാഹചര്യത്തില് താഴ്ന്ന പ്രദേശങ്ങളിലും പുഴയോരങ്ങള്, ഉരുള്പൊട്ടല്, മണ്ണിടിച്ചില് സാധ്യതയുള്ള തായി കണ്ടെത്തിയ പ്രദേശങ്ങളിലും താമസിക്കുന്നവര് അതീവ ജാഗ്രത പാലിക്കേണ്ടതാണ്. തദ്ദേശ സ്ഥാപനങ്ങളും മറ്റ് സര്ക്കാര് സംവിധാനങ്ങളും അപകട സാധ്യത മുന്നില് കണ്ട് കൊണ്ടുള്ള തയ്യാറെടുപ്പുകള് നടത്തണം.
അടിയന്തരമായി ക്യാമ്പുകള് തുറക്കേണ്ട സാഹചര്യമുണ്ടായാല് അതിനുളള നടപടികള് സ്വീകരിക്കേണ്ടതാണെന്നും ജില്ലാ കളക്ടര് ഡോ.അദീല അബ്ദുളള പറഞ്ഞു. ഏതെങ്കിലും സാഹചര്യത്തില് ആളുകളെ ക്യാമ്പുകളിലേക്ക് മാറ്റേണ്ട സാഹചര്യമുണ്ടായാല് അവര്ക്ക് പ്രത്യേകം വാക്സിനേഷന് സൗകര്യം ഒരുക്കുന്നതിനുളള നടപടികളും സ്വീകരിക്കണം. ഇതിനായി ഒരു വാക്സിനേഷന് പ്ലാന് തയ്യാറാക്കി സമര്പ്പിക്കാനും നിര്ദ്ദേശം നല്കിയിട്ടുണ്ട്.
ജില്ലയില് പ്രവര്ത്തിക്കുന്ന മുഴുവന് റിസോര്ട്ടുകളും ഹോംസ്റ്റേകളും താമസക്കാരെ സംബന്ധിച്ചുളള വിവരങ്ങള് നല്കേണ്ടതാണ്. ജില്ലാ എമര്ജന്സി ഓപ്പറേറ്റിംഗ് സെന്റര് തയ്യാറാക്കിയ സ്പ്രെഡ് ഷീറ്റിലാണ് ഇവ നല്കേണ്ടത്. രജിസ്ട്രേഷന് ഇല്ലാതെ പ്രവര്ത്തിക്കുന്ന സ്ഥാപനങ്ങളിലേയും കണക്കുകള് ശേഖരിക്കാനും കളക്ടര് നിര്ദ്ദേശിച്ചു. അടിയന്തര സാഹചര്യത്തില് രക്ഷാപ്രവര്ത്തനത്തിന് ഇവ സഹായകരമാകുമെന്ന് അവര് പറഞ്ഞു. പ്രളയത്തോട് അനുബന്ധിച്ച് ഉരുള്പൊട്ടലുണ്ടായ സ്ഥങ്ങളിലും പാരിസ്ഥിതി ലോല പ്രദേശങ്ങളിലും കനത്ത ജാഗ്രത പാലിക്കാന് നിര്ദ്ദേശമുണ്ട്. പലയിടങ്ങളില് നിന്നും ജനങ്ങളെ ഒഴിപ്പിച്ചിട്ടുണ്ട്. കഴിഞ്ഞ തവണ ഉരുള്പൊട്ടലുണ്ടായ പുത്തുമലയുള്പ്പെടെയുള്ള പ്രദേശങ്ങളില് നിന്ന് ആളുകളെ മാറ്റിപ്പാ൪പ്പിച്ചു.
