ഡല്ഹി: കര്ഷകരെ അവഗണിക്കുന്ന കേന്ദ്രത്തിന് മുന്നറിയിപ്പുമായി കര്ഷക നേതാവ് രാകേഷ് ടികായത്ത്. അവഗണിക്കുന്ന ആളുകളെ ഒരു പാഠം പഠിപ്പിക്കാന് കര്ഷകര്ക്ക് അറിയാമെന്നായിരുന്നു രാകേഷ് ടികായത്ത് പറഞ്ഞത്. 'കിസാന് പാര്ലമെന്റിന് ബധിരരും മൂകരുമായ സര്ക്കാരിനെ ഉണര്ത്താന് സാധിച്ചു. പാര്ലമെന്റ് എങ്ങനെ നടത്തണമെന്നും ഗ്രാമങ്ങളെ അവഗണിക്കുന്നവരെ ഒരു പാഠം പഠിപ്പിക്കാനും കര്ഷകര്ക്കറിയാം. ആരും അത് മറക്കരുത്' രാകേഷ് ടികായത്ത് ട്വീറ്റ് ചെയ്തു.
ഇന്ത്യയുടെ ആത്മാവിനെയും സ്വാതന്ത്ര്യത്തെയും സംരക്ഷിക്കാന് കര്ഷകര് എന്നും ഒത്തൊരുമയോടെ നില്ക്കണമെന്നും അദ്ദേഹം പറഞ്ഞു. വര്ഷകാല സമ്മേളനം നടക്കുന്ന പാര്ലമെന്റിനടുത്തുളള കര്ഷകരുടെ പ്രതിഷേധം മൂന്ന് ദിവസം പിന്നിട്ടു. കര്ഷകര് ഇന്നും പ്രതിഷേധിക്കുന്നുണ്ടെന്ന് സര്ക്കാരിനെ ഓര്മ്മിപ്പിക്കാനാണ് പാര്ലമെന്റിനുപുറത്ത് പ്രതിഷേധിക്കുന്നതെന്ന് കര്ഷകര് പറഞ്ഞു.
ആഗസ്റ്റ് 13 വരെ കര്ഷകര് പാര്ലമെന്റിനുമുന്നില് പ്രതിഷേധിക്കും. 200 കര്ഷകരും അഞ്ച് കര്ഷകനേതാക്കളുമാണ് ഓരോ ദിവസവും സമരവേദിയിലെത്തുക.ദിവസവും രാവിലെ പതിനൊന്ന് മണിമുതല് വൈകുന്നേരം അഞ്ചുമണിവരെയാണ് കര്ഷകര്ക്ക് പാര്ലമെന്റിനുമുന്നില് പ്രതിഷേധിക്കാന് അനുമതി. സമരത്തിനുശേഷം കര്ഷകര് സമരവേദികളിലേക്ക് മടങ്ങണം. ഓരോ ദിവസവും പ്രതിഷേധിക്കാനെത്തുന്ന കര്ഷകരുടെ പേരുവിവരങ്ങളും തിരിച്ചറിയല് രേഖകളും മുന്കൂട്ടി പൊലീസിന് നല്കണം.
