അഫ്ഗാനിസ്ഥാനില് താലിബാന് അധികാരം പിടിച്ചെടുത്തത സംഭവത്തില് ഇന്ത്യയ്ക്ക് മുന്നറിയിപ്പുമായി ബിജെപി നേതാവ് സുബ്രമണ്യന് സ്വാമി. താലിബാന് ചൈനയും പാക്കിസ്ഥാനുമായി സഖ്യമുണ്ടാക്കി ഒരു വര്ഷത്തിനുളളില് ഇന്ത്യയെ ആക്രമിക്കുമെന്നാണ് സുബ്രമണ്യന് സ്വാമി പറയുന്നത്. അഫ്ഗാനിസ്ഥാനെ സുരക്ഷിത താവളമായി ഉപയോഗിച്ച് അവര് ഇന്ത്യയെ ആക്രമിക്കുമെന്ന് സുബ്രമണ്യന് സ്വാമി ട്വീറ്റ് ചെയ്തു.
അഫ്ഗാനിസ്ഥാനില് താലിബാന് പിന്തുണ നല്കുന്നത് ചൈനയും പാക്കിസ്ഥാനുമാണെന്ന് ആരോപണങ്ങളുയരുന്നുണ്ട്. അഫ്ഗാനിസ്ഥാന് താലിബാനില് നിന്ന് വീണ്ടെടുക്കാനായി താലിബാന് വിരുദ്ധ ശക്തികള്ക്ക് ഇന്ത്യ വാതില് തുറന്നുനല്കണമെന്ന് സുബ്രമണ്യന് സ്വാമി കഴിഞ്ഞ ദിവസം ആവശ്യപ്പെട്ടിരുന്നു. കാബൂളിലെ ന്യൂനപക്ഷങ്ങളെ സംരക്ഷിക്കാനായി ഇന്ത്യ ഇരുപതിനായിരം സൈനികരെ വിന്യസിക്കണമെന്നും സുബ്രമണ്യന് സ്വാമി മോദി സര്ക്കാരിനോടാവശ്യപ്പെട്ടിരുന്നു.
കഴിഞ്ഞ ദിവസമാണ് അഫ്ഗാനിസ്ഥാന് തലസ്ഥാനമായ കാബൂള് താലിബാന് തീവ്രവാദികള് പിടിച്ചെടുത്തത്. കാബൂളിന്റെ നാലുഭാഗവും താലിബാന് തീവ്രവാദികള് പിടിച്ചടക്കിയതായി അഫ്ഗാനിസ്ഥാന് ആഭ്യന്തരമന്ത്രാലയം സ്ഥിരീകരിച്ചിരുന്നു. താലിബാന് തീവ്രവാദികള് കാബൂള് നഗരത്തില് പ്രവേശിച്ചപ്പോള് തന്നെ അഫ്ഗാനിസ്ഥാന് പ്രസിഡന്റ് അഷ്റഫ് ഗാനി രാജ്യം വിട്ടിരുന്നു. പുതിയ സര്ക്കാര് ഉടന് രൂപീകരിക്കുമെന്നും അഫ്ഗാനിസ്ഥാന്റെ പേര് ഇസ്ലാമിക് എമിറേറ്റ് ഓഫ് അഫ്ഗാനിസ്ഥാന് എന്നാക്കിമാറ്റിയുളള പ്രഖ്യാപനം ഉടനുണ്ടാകുമെന്നും താലിബാന് വ്യക്തമാക്കിയിരുന്നു.
