ഡല്‍ഹി: ഒരിടവേളയ്ക്ക് ശേഷം ലക്ഷ്യബോധത്തോടെയുള്ള പ്രതിപക്ഷ കക്ഷികളുടെ യോഗത്തില്‍ നേതൃത്വം സ്വയം ഏറ്റെടുത്ത് കോണ്‍ഗ്രസ് അധ്യക്ഷ സോണിയാഗാന്ധി. ''നമുക്ക് മുന്നില്‍ മറ്റുവഴികളില്ല, ഒറ്റക്കെട്ടായി നില്‍ക്കണമെന്നാവശ്യപ്പെടുന്ന സമയം വന്നുചേര്‍ന്നിരിക്കുന്നു. പൊതുതെരെഞ്ഞെടുപ്പ് മുന്നില്‍ക്കണ്ട് ഒറ്റക്കെട്ടായി മുന്നേറണം."- സോണിയാ ഗാന്ധിയുടെ പ്രസംഗവും ആഹ്വാനവും പ്രതിപക്ഷ കക്ഷികളുടെ യോഗത്തില്‍ പുതിയ ആവേശം പകര്‍ന്നു. "ചില നിര്‍ബന്ധങ്ങളുള്ളവരാണ് നാമെല്ലാവരും, എന്നാല്‍ അതെല്ലാം മാറ്റിവെച്ചുകൊണ്ട് രാജ്യതാത്പര്യത്തിനൊപ്പം നില്‍ക്കണമെന്ന് ആവശ്യപ്പെടുന്ന സന്ദര്‍ഭമാണിത്-19 പ്രതിപക്ഷ പാര്‍ട്ടികള്‍ പങ്കെടുത്ത യോഗത്തില്‍ സോണിയാഗാന്ധി പറഞ്ഞു.
എന്‍സിപി അധ്യക്ഷനും രാജ്യത്തെ ഏറ്റവും മുതിര്‍ന്ന നേതാക്കളില്‍ ഒരാളുമായ ശരത് പവാര്‍, സിപിഎം ജനറല്‍ സെക്രട്ടറി സീതാറാം യെച്ചൂരി, സിപിഐ സെക്രട്ടറി ഡി രാജ, തമിഴ്‌നാട്‌ മുഖ്യമന്ത്രി എം കെ സ്റ്റാലിന്‍, പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി, മഹാരാഷ്ട്രാ മുഖ്യമന്ത്രിയും ശിവസേനാ നേതാവുമായ ഉദ്ധവ് താക്കറെ, ജാര്‍ഖണ്ഡ് മുഖ്യമന്ത്രി ഹേമന്ത് സോറന്‍, ആര്‍ജെഡി നേതാവും ബീഹാര്‍ പ്രതിപക്ഷ നേതാവുമായ തേജസ്വി യാദവ് തുടങ്ങിയവര്‍ വീഡിയോ കോണ്‍ഫ്രന്‍സ് വഴിനടന്ന യോഗത്തില്‍ ആവേശത്തോടെയാണ് പങ്കെടുത്തത്. '' ഈ വെല്ലുവിളി ഒത്തൊരുമിച്ച് നിന്നാല്‍ മാത്രമേ നമുക്ക് നേരിടാന്‍ കഴിയൂ, കാലത്തിന്റെ ആവശ്യത്തിനൊത്ത് ഉയരാന്‍ നാം തയാറാകണം. നമുക്കതിന് കഴിയും" സോണിയാഗാന്ധി കൂട്ടിച്ചേര്‍ത്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
സോണിയാ ഗാന്ധി വിളിച്ചുചേര്‍ത്ത യോഗത്തില്‍ യാതൊരെതിര്‍പ്പുമില്ലാതെയാണ് മറ്റ് പ്രതിപക്ഷ പാര്‍ട്ടികള്‍ പങ്കെടുത്തത്. കോണ്‍ഗ്രസ്, ഡിഎംകെ, എന്‍സിപി, സിപിഎം, സിപിഐ, തൃണമുല്‍ കോണ്‍ഗ്രസ്, ആര്‍എസ് പി, ശിവസേന, ആര്‍ജെഡി, പിഡിപി, നാഷണല്‍ കോണ്‍ഫ്രന്‍സ്, ജെഎംഎം, എല്‍ജെഡി, കേരളാ കോണ്‍ഗ്രസ്, ഐയുഎംഎല്‍, ആര്‍എല്‍ഡി, വിസികെ, ടിഎംസി, ജെഡിഎസ് തുടങ്ങി 19 പാര്‍ട്ടികളുടെ നേതാക്കളാണ് യോഗത്തില്‍ പങ്കെടുത്തത്. സെപ്തംബര്‍ 20 മുതല്‍ 30 വരെയുള്ള കാലയളവില്‍ വലിയ തോതിലുള്ള ബഹുജന സമരങ്ങള്‍ സംഘടിപ്പിക്കാനും യോഗത്തില്‍ തീരുമാനമായി.
