പാലക്കാട്: അട്ടപ്പാടിയില് അരിവാള് രോഗമുളള ആദിവാസി സ്ത്രീകള് പ്രസവിക്കരുതെന്ന് ആരോഗ്യവകുപ്പ്. അരിവാള് രോഗമുളളവര് പ്രസവിക്കുന്നത് അമ്മയ്ക്കും കുഞ്ഞിനും അപകടകരമായതിനാലാണ് അട്ടപ്പാടിയിലെ സ്ത്രീകള് ഗര്ഭം ധരിക്കരുതെന്ന് ആരോഗ്യവകുപ്പ് നിര്ദേശം നല്കിയിരിക്കുന്നത്. സിക്കിള് സെല് അനീമിയ ബാധിച്ചവർക്ക് ഗര്ഭം ധരിക്കാനും പ്രസവിക്കാനുമുളള ശേഷി കുറവായിരിക്കുമെന്ന റിപ്പോര്ട്ടുകളുടെ അടിസ്ഥാനത്തിലാണ് ആരോഗ്യവകുപ്പ് ഇത്തരമൊരു നിര്ദേശം പുറപ്പെടുവിച്ചിരിക്കുന്നത്.
അട്ടപ്പാടിയിലുളള ഇരുന്നൂറോളം പേര് അരിവാള് രോഗബാധിതരാണെന്നും 80 ശതമാനം ആദിവാസികളും വിളര്ച്ചാ രോഗികളാണെന്നുമാണ് ആരോഗ്യവകുപ്പിന്റെ റിപ്പോര്ട്ട്. ആദിവാസി ഊരുകളിലുളള രണ്ടായിരത്തോളം പേര് ഏതുസമയവും രോഗം ബാധിക്കാന് സാധ്യതയുളളവരാണ്. ഇവിടുളളവര് പോഷകാഹാരക്കുറവ് നേരിടുന്നവരും അനീമിയ ബാധിതരുമാണ്. അനീമിയ ബാധിക്കുന്നതാണ് അട്ടപ്പാടിയില് ശിശുമരണ നിരക്ക് വര്ധിക്കാന് കാരണമെന്നും ആരോഗ്യവകുപ്പിന്റെ റിപ്പോര്ട്ടില് പറയുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അനീമിയക്ക് ലോകത്തെവിടെയും മരുന്ന് കണ്ടുപിടിക്കാത്തതിനാല് ബോധവത്ക്കരണവും പ്രതിരോധ പ്രവര്ത്തനങ്ങളും നടത്തുക മാത്രമാണ് ഏക വഴിയെന്നാണ് ആരോഗ്യവകുപ്പ് ഉദ്യോഗസ്ഥര് പറയുന്നത്. അട്ടപ്പാടിയിലെ പ്രവര്ത്തനങ്ങള്ക്ക് മേല്നോട്ടം വഹിക്കാനായി നോഡല് ഓഫീസറെ നിയമിക്കാന് സര്ക്കാര് തീരുമാനിച്ചിട്ടുണ്ട്. ആദിവാസികള്ക്കിടയിലെ ആരോഗ്യ പ്രശ്നങ്ങള് നിരീക്ഷിക്കാന് മോണിറ്ററിംഗ് കമ്മിറ്റിയും രൂപീകരിക്കും.
