തൃശൂര്: സംയുക്ത സേനാ മേധാവി ജനറല് ബിപിന് റാവത്ത് കൊല്ലപ്പെട്ട ഹെലികോപ്ടര് ദുരന്തത്തില് ഉണ്ടായിരുന്ന ഏക മലയാളി വ്യോമസേന ഉദ്യോഗസ്ഥന് എ പ്രദീപ് കുമാറിന് ഇന്ന് നാട് വിട നല്കും. അദ്ദേഹത്തിന്റെ ജന്മനാടായ തൃശൂര് പുത്തൂരിലെ വീട്ടുവളപ്പിലാണ് വൈകീട്ടോടെ സംസ്കാരം നടക്കുക.
ഇന്ന് രാവിലെ 7 മണിയോടെ ഡല്ഹിയില് നിന്ന് കോയമ്പത്തൂരിലേക്ക് കൊണ്ടുവന്ന മൃതദേഹം 11 മണിയോടെ സുലൂര് വ്യോമസേന ആസ്ഥാനത്തെത്തിച്ചു. അവിടെനിന്ന് അലംകൃത വാഹനത്തില് തൃശ്ശൂരിലേക്ക് പുറപ്പെട്ട വാഹനത്തില് സേനാംഗങ്ങളും ബന്ധുക്കളുമായി നിരവധി പേര് ഉണ്ട്. നിരവധി വാഹനങ്ങള് അകമ്പടിയായി സഞ്ചരിക്കുന്നുണ്ട്. ഉച്ചയോടെ വാളയാര് അതിര്ത്തിയില് മന്ത്രിമാരായ കെ രാധാകൃഷ്ണന്, ആര് ബിന്ദു, കെ കൃഷ്ണന് കുട്ടി, കെ രാജന് എന്നിവരടങ്ങിയ സംഘം മൃതദേഹം ഏറ്റുവാങ്ങും.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഉച്ചയ്ക്ക് ഒരു മണിയോടെ റോഡ് മാര്ഗം മൃതദേഹം വഹിച്ച വാഹനം തൃശൂര് പുത്തൂരിലെത്തുമെന്നാണ് കരുതുന്നത്. പ്രദീപ് പഠിച്ച പുത്തൂര് സ്കൂളില് പൊതുദര്ശനത്തിന് വെച്ചശേഷം വൈകിട്ടോടെയായിരിക്കും അന്ത്യചടങ്ങുകള് നടക്കുക. വീട്ടുവളപ്പില് സംസ്കാരം നടത്താനാണ് കുടുംബത്തിന്റെ തീരുമാനം. കോയമ്പത്തൂരില് നിന്നും പ്രദീപിന്റെ ഭാര്യ ശ്രീലക്ഷ്മിയും മക്കളും കഴിഞ്ഞ ദിവസം രാത്രി തന്നെ തൃശൂര് പൊന്നുകരയിലെ വീട്ടില് എത്തിയിരുന്നു. ദക്ഷിണ് ദേവ് (7), ദേവപ്രയാഗ് (2) എന്നിവരാണ് പ്രദീപിന്റെ മക്കള്. 37 കാരനായ പ്രദീപ് പൊന്നൂക്കര അറയ്ക്കല് രാധാകൃഷ്ണന്റെയും കുമാരിയുടെയും മകനാണ്. സൈന്യത്തില് ജൂനിയര് വാറന്റ് ഓഫീസറായിരുന്നു പ്രദീപ്.
