2021-ലെ വിശ്വസുന്ദരി പട്ടം സ്വന്തമാക്കി ഇന്ത്യയുടെ ഹര്നാസ് സന്ധു. ഇസ്രയേലിലെ എയ്ലറ്റില് വെച്ച് നടന്ന എഴുപതാമത് മിസ് യൂണിവേഴ്സ് മത്സരത്തിലാണ് ഇരുപത്തിയൊന്നുകാരിയായ ഹര്നാസ് ഇന്ത്യയുടെ അഭിമാനമായത്. പരാഗ്വേയുടെയും ദക്ഷിണാഫ്രിക്കയുടെയും മത്സരാര്ത്ഥികളെ പിന്നിലാക്കിയാണ് ഹര്നാസ് വിജയിയായത്. വിശ്വസുന്ദരി കിരീടം ചൂടുന്ന മൂന്നാമത്തെ ഇന്ത്യക്കാരിയാണ് ഹര്നാസ് സന്ധു. 1994-ല് സുസ്മിത സെന്നും 2000-ല് ലാറാ ദത്തയും മിസ് യൂണിവേഴ്സ് പട്ടം നേടിയിരുന്നു.
കഴിഞ്ഞ വര്ഷം മിസ് യൂണിവേഴ്സായിരുന്ന മെക്സികോയുടെ ആന്ഡ്രിയ മെസയാണ് ഹര്നാസിന് വിശ്വസുന്ദരി കിരീടം അണിയിച്ചത്. പരാഗ്വെയുടെ നാദിയ ഫെറെയ്റ ഫസ്റ്റ് റണ്ണര് അപ്പായും സൗത്ത് ആഫ്രിക്കയുടെ ലലേല ലാലി മ്സ്വാനെയെ സെക്കന്റ് റണ്ണറപ്പായും തെരഞ്ഞെടുത്തു. പരിപാടി ലൈവ് സ്ട്രീമിംഗ് ചെയ്തിരുന്നു.
പഞ്ചാബ് സ്വദേശിയായ ഹര്നാസ് പബ്ലിക് അഡ്മിനിസ്ട്രേഷനില് ബിരുദാനന്തര ബിരുദം ചെയ്യുകയാണ്. 2019-ല് ഫെമിന മിസ് ഇന്ത്യ പഞ്ചാബായി തെരഞ്ഞെടുത്തിരുന്നു. യാരാ ദിയാന് പൂ ബരണ്, ബായ് ജി കൂട്ടാങ്കെ തുടങ്ങിയ പഞ്ചാബി ചിത്രങ്ങളിലും അഭിനയിച്ചിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
