ലക്നൌ: ഇന്ദിരാഗാന്ധിയുടെ കൊച്ചു മകനും സഞ്ജയ്- മേനകാ ദമ്പതികളുടെ മകനുമായ വരുണ് ഗാന്ധിയുടെ ബിജെപി വിമര്ശം രൂക്ഷമാകുന്നു. നിരന്തരം യു പി മുഖ്യമന്ത്രി യോഗി ആദിത്യനാഥിനെ വിമര്ശിച്ചുകൊണ്ടിരുന്ന വരുണ് ഇത്തവണ പ്രധാനമന്ത്രി നരേന്ദ്ര മോദിക്കെതിരെയാണ് പ്രത്യക്ഷത്തില് രംഗത്തുവന്നിരിക്കുന്നത്. രാജ്യത്ത് വര്ധിക്കുന്ന തൊഴിലില്ലായ്മയും നാണയപ്പെരുപ്പവും ചൂണ്ടിക്കാട്ടിയാണ് അദ്ദേഹത്തിന്റെ വിമര്ശനം.‘രാജ്യം ഗുരുതരമായ ഘട്ടത്തിലൂടെയാണ് കടന്നുപോകുന്നത്. പണപ്പെരുപ്പം ആകാശം തൊടുകയാണ്. തൊഴിലില്ലായ്മ നിരക്കില് വന് വര്ധനയാണ്’ വരുണ് ഗാന്ധി കുറ്റപ്പെടുത്തി.
രാജ്യത്തിന്റെ പൊതുമുതലാണ് വിറ്റഴിച്ചുകൊണ്ടിരിക്കുന്നത്. സ്വകാര്യവത്കരണത്തിന്റെ പേരില് എല്ലാം വിറ്റഴിച്ചാല് പിന്നെ എന്താണ് ഉണ്ടാകാന് പോകുന്നത് എന്നതിനെ കുറിച്ച് ആലോചിക്കണമെന്നും വരുണ് ഗാന്ധി ഓര്മ്മപ്പെടുത്തി. അതുകൊണ്ടുതന്നെ അഴിമതിനിറഞ്ഞ രാഷ്ട്രീയത്തെ കുറിച്ച് ജനങ്ങള് ബോധവാന്മാരായിരിക്കണം. അഴിമതി രാഷ്ട്രീയത്തെക്കുറിച്ച് ജനങ്ങള് ബോധവാന്മാരായിരിക്കണമെന്നും അദ്ദേഹം പറഞ്ഞു. ‘സ്വാര്ത്ഥതയും അഴിമതിയും നിറഞ്ഞതാണ് ഇന്നത്തെ രാഷ്ട്രീയം. രാജ്യത്തെക്കുറിച്ച് ആവലാതിപ്പെടുന്ന സത്യസന്ധരായ ആളുകളെ രാഷ്ട്രീയത്തിലേക്ക് കൊണ്ടുവരണം. നമ്മുടെ കഷ്ടപ്പാടുകളെ.സ്വന്തം പ്രശ്നങ്ങളായി കണ്ട് പ്രശ്നപരിഹാരം നടത്തുന്ന നേതാക്കളെ തെരഞ്ഞെടുക്കണം’ -എന്നായിരുന്നു വരുണ് ഗാന്ധിയുടെ വാക്കുകള്.
ബിജെപിയുടെ പിലിഭിത്തില് നിന്നുള്ള ലോക്സഭാംഗമാണ് വരുണ് ഗാന്ധി. അഞ്ചു സംസ്ഥാനങ്ങളില് തെരഞ്ഞെടുപ്പ് അടിവാതില്ക്കല് എത്തിനില്ക്കെ വരുണ് ഗാന്ധി നിരംന്തരം പാര്ട്ടിക്കെതിരായി രംഗത്തുവരുന്നത് ബിജെപിക്ക് തലവേദനയായിരിക്കുകയാണ്. നിരന്തര വിമര്ശനത്തെ തുടര്ന്ന് പാര്ട്ടിയുടെ ദേശീയ കൌണ്സിലില് നിന്ന് അമ്മ മേനകാ ഗാന്ധിയേയും ബിജെപി ഒഴിവാക്കിയിരുന്നു.
