കൊച്ചി: നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥരെ വധിക്കാന് ഗൂഢാലോചന നടത്തിയെന്ന കേസില് നടന് ദിലീപിന്റെ മുന്കൂര് ജാമ്യാപേക്ഷ കോടതി ഇന്ന് പരിഗണിക്കും. ദിലീപ് അടക്കമുള്ള പ്രതികളെ മൂന്ന് ദിവസം ചോദ്യം ചെയ്തതിന്റെ വിശദാംശങ്ങള് അന്വേഷണ ഉദ്യോഗസ്ഥര് ഇന്ന് മുദ്രവെച്ച കവറില് കോടതിയില് ഹാജരാക്കും. ഇക്കാര്യം പരിശോധിച്ചതിന് ശേഷമായിരിക്കും പ്രതികള്ക്ക് മുന്കൂര് ജാമ്യം അനുവദിക്കണോ എന്ന കാര്യത്തില് തീരുമാനമെടുക്കുക. ഗൂഢാലോചനാ കേസില് 6 പ്രതികള് ആണുള്ളത്. ഇതില് ദിലീപ്, സഹോദരന് അനൂപ്, സഹോദരി ഭര്ത്താവ് സുരാജ്, ബന്ധവായ അപ്പു, സുഹ്യത്ത് ബൈജു എന്നിവരെ ഹൈക്കോടതിയുടെ അനുമതിയോടെ അന്വേഷണ സംഘം കഴിഞ്ഞ ദിവസം ചോദ്യം ചെയ്തിരുന്നു.
അതേസമയം, കേസ് അന്വേഷണത്തില് പ്രതികള് സഹകരിക്കുന്നില്ലെന്നും, നിര്ദ്ദേശം നല്കിയിട്ടും ഫോണ് അടക്കമുള്ള കാര്യങ്ങള് അന്വേഷണ സംഘത്തിന് മുന്പില് ഹാജരാക്കിയിട്ടില്ലെന്നും പ്രോസിക്യൂഷന് കോടതിയെ അറിയിക്കും. ഫോണുകള് ഹാജരാക്കണമെന്ന് അന്വേഷണ ഉദ്യോഗസ്ഥര് കഴിഞ്ഞ ദിവസം ആവശ്യപ്പെട്ടിരുന്നു. പഴയ ഫോണിന് പകരം പുതിയ ഫോണുകള് നല്കി ദിലീപ് അന്വേഷണ സംഘത്തെ കബളിപ്പിക്കുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
എന്നാൽ ഗൂഡാലോചന കേസ് കെട്ടിച്ചമച്ച കേസ് ആണെന്നും അന്വേഷണസംഘത്തിന്റെ ആവശ്യം അംഗീകരിക്കാനാകില്ലെന്നുമാണ് ദിലീപ് വ്യക്തമാക്കിയിരിക്കുന്നത്. നിലവിലുള്ള കേസുമായി ബന്ധപ്പെട്ട തെളിവുകൾ ഫോണിൽ ഇല്ല. ഫോൺ ശാസ്ത്രീയ പരിശോധനയ്ക്ക് അയച്ചു. പരിശോധനാ ഫലം കോടതിയിൽ നൽകാമെന്നും ദിലീപ് പറഞ്ഞു. ഡിസംബർ ഒമ്പതിന് വധഭീഷണി കേസ് എടുത്തതിന് പിന്നാലെ പ്രതികൾ ഉപയോഗിച്ച അഞ്ച് ഫോണുകൾ പെട്ടെന്ന് മാറ്റുകയും പുതിയ ഫോണുകളിൽ സിംകാർഡ് ഇട്ടുവെന്നുമാണ് കണ്ടെത്തിയിട്ടുള്ളത്. ഗൂഡാലോചനയുടെ നിർണ്ണായക തെളിവുകൾ ലഭിക്കുമായിരുന്ന ഫോൺ ഒളിപ്പിച്ചത് തെളിവ് നശിപ്പിക്കാൻ ആണെന്നാണ് ക്രൈം ബ്രാഞ്ച് വിലയിരുത്തൽ.