ഡല്‍ഹി: ഭിന്നിപ്പിന്റെ രാഷ്ട്രീയമാണ് ബിജെപി ഭരണകൂടം പിന്തുടരുന്നതെന്ന് കോണ്‍ഗ്രസ് അധ്യക്ഷ സോണിയാ ഗാന്ധി. വഞ്ചനാപരമായ അവരുടെ നിലപാടിനെതിരെ പ്രതികരിക്കുന്നവരെ നിശബ്ദരാക്കുകയും ഇല്ലായ്മ ചെയ്യുകയുമാണ് ബിജെപി ചെയ്യുന്നതെന്നും പ്രതിപക്ഷത്തെ അടിച്ചമര്‍ത്താന്‍ ഔദ്യോഗിക സംവിധാനം ദുരുപയോഗപ്പെടുത്തുകയാണെന്നും സോണിയാ ഗാന്ധി പറഞ്ഞു. സോണിയാ ഗാന്ധിയുടേതെന്ന നിലയില്‍ ഒരു പ്രമുഖ മലയാളം മാധ്യമം പ്രസിദ്ധീകരിച്ച ലേഖനത്തിലാണ് ഇക്കാര്യം പറയുന്നത്.
'നവംബര്‍ 26 മോദി സര്‍ക്കാര്‍ ഭരണഘടനാദിനമായി ആചരിക്കാന്‍തുടങ്ങി. ഭരണഘടനയോട് തെല്ലും കൂറ് പുലര്‍ത്താതെ, ഓരോ ഭരണഘടനാ സ്ഥാപനങ്ങളെയും ഷണ്ഡീകരിക്കുന്ന പ്രവര്‍ത്തനവും ഒപ്പം നടത്തുന്നുണ്ട്. എന്തൊരു കാപട്യമാണ് അവര്‍ കാണിക്കുന്നത്. ജനങ്ങള്‍ക്കിടയില്‍ വെറുപ്പും വിദ്വേഷവും വിഭാഗീയതയും വളര്‍ത്തുന്ന തരത്തില്‍ പ്രവര്‍ത്തിക്കുകയും പ്രസംഗിക്കുകയും ചെയ്യുന്ന വ്യക്തികള്‍ക്കും സംഘടനകള്‍ക്കുമെതിരെ ശക്തമായ നടപടിയെടുക്കാന്‍ മോദി സര്‍ക്കാര്‍ എന്തുകൊണ്ടാണ് തയാറാകാത്തത്? അത്തരക്കാര്‍ ഔദ്യോഗികമായിതന്നെ സംരക്ഷിക്കപ്പെടുകയാണ്.-സോണിയാ ഗാന്ധി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഹിന്ദുക്കളല്ലാതെ, മറ്റ് മതങ്ങളില്‍ വിശ്വസിക്കുന്നവര്‍ ചോദ്യംചെയ്യപ്പെടുകയാണ്. അവര്‍ തിരസ്‌കരിക്കപ്പെടുന്നു. ദിനംപ്രതി ഭീതിദമായ ഒരു സാഹചര്യമാണ് രാജ്യത്ത് ഉടലെടുത്തുകൊണ്ടിരിക്കുന്നത്. തൊഴിലിടങ്ങളും അയല്‍പ്പക്കങ്ങളും ഗൃഹാന്തരീക്ഷംപോലും വിഷലിപ്തമായിരിക്കുകയാണ്. വെറുപ്പും പകയും വിദ്വേഷവും ഒരു വ്യക്തിയെ നയിക്കുന്ന ഭീകരമായ അവസ്ഥയിലൂടെയാണ് രാജ്യം ഇപ്പോള്‍ കടന്നുപോകുന്നത്- സോണിയ കൂട്ടിച്ചേര്‍ത്തു.
