ഡെറാഡൂണ്: ദളിത് സ്ത്രീയുണ്ടാക്കിയ ഭക്ഷണം കഴിക്കാന് സവര്ണ്ണ ജാതിയില്പ്പെട്ട കുട്ടികള് വിസമ്മതിച്ച സ്കൂളിലെത്തി ഭക്ഷണം കഴിച്ച് ജില്ലാ കളക്ടര്. ഉത്തരാഖണ്ഡിലെ ചമ്പാവത് ജില്ലയിലാണ് സംഭവം. ജില്ലാ കളക്ടര് നരേന്ദ്ര സിംഗ് ബണ്ഡാരിയാണ് സംസ്ഥാന വിദ്യാഭ്യാസ വകുപ്പിലെ ഉദ്യോഗസ്ഥര്ക്കൊപ്പം സ്കൂളിലെത്തി ഭക്ഷണം കഴിച്ചത്. കുട്ടികളുടെ മനസില്നിന്ന് ജാതിവെറി മായ്ച്ചുകളയാനാണ് താന് സ്കൂളിലെത്തി അതേ ദളിത് സ്ത്രീയുണ്ടാക്കിയ ഭക്ഷണം കഴിച്ചതെന്ന് കളക്ടര് പറഞ്ഞു. ഉത്തരാഖണ്ഡിലെ സുഖിദാംഗ് സര്ക്കാര് സ്കൂളിലെ പത്തോളം വിദ്യാര്ത്ഥികളാണ് ദളിത് പാചകക്കാരിയുണ്ടാക്കിയ ഭക്ഷണം കഴിക്കാന് വിസമ്മതിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കഴിഞ്ഞ ഡിസംബറിലും ഇതേ സ്കൂളില് സമാന സംഭവമുണ്ടായിരുന്നു. ദളിത് വിഭാഗത്തില്നിന്നുളള സുനിതാ ദേവി എന്ന സ്ത്രീയാണ് സ്കൂളിലെ കുട്ടികള്ക്കായി ഭക്ഷണം തയാറാക്കിയിരുന്നത്. അന്ന് നാല്പ്പതോളം വിദ്യാര്ത്ഥികള് അവരുണ്ടാക്കുന്ന ഭക്ഷണം കഴിക്കില്ലെന്ന് പറഞ്ഞിരുന്നു. അടുത്ത ദിവസംതന്നെ സുനിതയെ ജോലിയില്നിന്ന് നീക്കിയത് രാജ്യവ്യാപക പ്രതിഷേധങ്ങള്ക്ക് കാരണമായി.
തുടര്ന്ന് മുഖ്യമന്ത്രി പുഷ്കര് സിംഗ് ധാമി ഇടപെട്ടാണ് സുനിതയെ ജോലിയില് തിരികെ പ്രവേശിപ്പിച്ചത്. അതേസമയം, വിദ്യാര്ത്ഥികള് സ്കൂളില് നിന്ന് ഭക്ഷണം കഴിക്കാന് തയാറായില്ലെങ്കില് ടി സി നല്കുമെന്ന് പ്രിന്സിപ്പാള് പ്രേം സിംഗ് പറഞ്ഞു. ഇത്തരം വിവേചനങ്ങള് സ്കൂളില് അനുവദിക്കില്ലെന്നും അദ്ദേഹം വ്യക്തമാക്കി.