കൊച്ചി: ആനക്കൊമ്പ് കേസില് നടന് മോഹന്ലാല് വിചാരണ നേരിടണം. കേസ് പിന്വലിക്കാന് അനുമതി നല്കണമെന്നാവശ്യപ്പെട്ടുളള സര്ക്കാരിന്റെ ഹര്ജി കോടതി തളളി. പെരുമ്പാവൂര് ഫസ്റ്റ് ക്ലാസ് മജിസ്ട്രേറ്റ് കോടതിയാണ് സര്ക്കാരിന്റെ ഹര്ജി തളളിയത്. കേസുമായി മുന്നോട്ടുപോകാമെന്നും മോഹന്ലാല് തുടര്നടപടികള് നേരിടണമെന്നും കോടതി വ്യക്തമാക്കി. വന്യജീവി സംരക്ഷണ നിയമപ്രകാരം എടുത്ത കേസ് പിന്വലിക്കണമെന്നാവശ്യപ്പെട്ട് 2016-ലും 2019-ലും മോഹന്ലാല് സര്ക്കാരിനെ സമീപിച്ചിരുന്നു. തുടര്ന്നാണ് കേസ് പിന്വലിക്കാന് സര്ക്കാര് തീരുമാനിച്ചത്. കേസ് തുടര്നടപടികള്ക്കായി ജൂണ് പതിനാറിലേക്ക് മാറ്റി.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
2012-ലായിരുന്നു മോഹന്ലാലിന്റെ കൊച്ചി തേവരയിലെ വീട്ടില് നിന്ന് ആനക്കൊമ്പുകള് കണ്ടെത്തിയത്. ഇന്കംടാക്സ് നടത്തിയ പരിശോധനകള്ക്കിടെയാണ് ആനക്കൊമ്പുകള് പിടിച്ചെടുത്തത്. സംഭവത്തില് വനംവകുപ്പ് കേസെടുത്തു. എന്നാല് ആനക്കൊമ്പുകള് താന് കെ കൃഷ്ണകുമാര് എന്നയാളില്നിന്നും പണംകൊടുത്ത് വാങ്ങിയതാണ് എന്നായിരുന്നു മോഹന്ലാലിന്റെ വാദം. ഇത് അംഗീകരിച്ച് നിയമം പരിഷ്കരിച്ച് ആനക്കൊമ്പുകള് കൈവശം വയ്ക്കാന് യുഡിഎഫ് സര്ക്കാര് മോഹന്ലാലിന് അനുമതി നല്കി. തുടര്ന്ന് വന്ന എല്ഡിഎഫ് സര്ക്കാരും മോഹന്ലാലിനെതിരായ കേസ് പിന്വലിക്കുന്നതില് എതിര്പ്പില്ലെന്ന് കാണിച്ച് ഹര്ജി നല്കുകയായിരുന്നു. ആ ഹര്ജിയാണ് കോടതി ഇപ്പോള് തളളിയത്.