ഡല്ഹി: പ്രവാചക നിന്ദ നടത്തിയ ബിജെപി മുന് ദേശീയ വക്താവ് നൂപുര് ശര്മ്മ രാജ്യത്തോട് മാപ്പുപറയണമെന്ന് സുപ്രീംകോടതി. നൂപുര് ശര്മ്മയുടെ പരാമര്ശം രാജ്യത്ത് കലാപം സൃഷ്ടിച്ചെന്നും ഉദയ്പൂരില് നടന്ന ദാരുണ കൊലപാതകത്തിനുകാരണം അവരുടെ പ്രസ്താവനയാണെന്നും സുപ്രീംകോടതി പറഞ്ഞു. പ്രവാചക നിന്ദയുടെ പേരില് രാജ്യത്തുണ്ടായ ആക്രമണങ്ങളുടെയെല്ലാം ഉത്തരവാദി നൂപുര് ശര്മ്മയാണെന്ന് പറഞ്ഞ കോടതി, അവര് ജനങ്ങളുടെ വികാരങ്ങള് ആളിക്കത്തിച്ചു എന്നും കുറ്റപ്പെടുത്തി. കോടതിയുടെ പരിഗണനയിലുളള വിഷയം ടിവി ചാനല് ചര്ച്ചയില് എന്തിനാണ് സംസാരിച്ചത്? വിവാദ പ്രസ്താവന പിന്വലിക്കാന് വൈകിയെന്നും അറസ്റ്റ് നടക്കാതിരുന്നത് അവര്ക്കുളള സ്വാധീനം വ്യക്തമാക്കുന്നതാണെന്നും കോടതി വിമര്ശിച്ചു. തനിക്കെതിരായ എല്ലാ കേസുകളും ഡല്ഹിയിലേക്ക് മാറ്റണമെന്ന നൂപുര് ശര്മ്മയുടെ ഹര്ജി പരിഗണിക്കുകയായിരുന്നു സുപ്രീംകോടതി. ജസ്റ്റിസുമാരായ സൂര്യകാന്ത്, ജെ ബി പര്ദിവാല എന്നിവരടങ്ങിയ ബെഞ്ചാണ് അവരുടെ ഹര്ജി പരിഗണിച്ചത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
മെയ് 28-ന് ചാനല് ചര്ച്ചക്കിടെ അഭിഭാഷകയും ബിജെപി ദേശീയ വക്താവുമായിരുന്ന നൂപുര് ശര്മ്മ പ്രവാചകന് മുഹമ്മദ് നബിക്കെതിരെ നടത്തിയ പരാമര്ശമാണ് വിവാദമായത്. നൂപുരിന്റെ പരാമര്ശം ദേശീയ, അന്തര്ദേശീയ തലത്തില് വലിയ ചര്ച്ചയായിരുന്നു. കുവൈറ്റും ഖത്തറുമുള്പ്പെടെയുളള അറബ് രാജ്യങ്ങള് ഇന്ത്യയെ പ്രതിഷേധമറിയിച്ചിരുന്നു. ഇതോടെ പാര്ട്ടി നൂപുര് ശര്മ്മയുടെ പ്രാഥമികാംഗത്വം ഒഴിവാക്കി സസ്പെന്ഡ് ചെയ്തു. നൂപുര് ശര്മ്മയുടെ പ്രസ്താവനക്കെതിരെ ഉത്തര്പ്രദേശിലെ കാണ്പൂരുള്പ്പെടെയുളള പ്രദേശങ്ങളില് വ്യാപക പ്രതിഷേധമുണ്ടാവുകയും അവ സംഘര്ഷത്തില് കലാശിക്കുകയും ചെയ്തിരുന്നു. സമുദായങ്ങള്ക്കിടയില് വിദ്വേഷം ജനിപ്പിക്കാനുളള ശ്രമം, മതവികാരം വ്രണപ്പെടുത്തല് തുടങ്ങിയ വകുപ്പുകള് ഉള്പ്പെടുത്തി നൂപുരിനെതിരെ കേസെടുത്തെങ്കിലും ഇതുവരെ അവരെ അറസ്റ്റ് ചെയ്തിട്ടില്ല. ഈ സാഹചര്യത്തിലാണ് നൂപുര് ശര്മ്മ രാജ്യത്തോട് മാപ്പുപറയണം എന്ന സുപ്രീം കോടതി വിധി.
