കൊച്ചി: ലൈംഗീക പീഡന പരാതിയില് സാംസ്കാരിക പ്രവര്ത്തകന് സിവിക് ചന്ദ്രന് മുന്കൂര് ജാമ്യം അനുവദിച്ച കോഴിക്കോട് ജില്ലാ സെക്ഷന് കോടതി വിധിക്കെതിരെ ഹൈക്കോടതിയില് അപ്പീല് നല്കാനൊരുങ്ങി സര്ക്കാര്. മുന്കൂര് ജാമ്യം റദ്ദാക്കണമെന്നാണ് സര്ക്കാര് ഹൈക്കോടതിയില് വാദിക്കുക. ഇരയായ സ്ത്രീ ലൈംഗികമായി പ്രകോപിപ്പിക്കുന്ന തരത്തില് വസ്ത്രം ധരിച്ചതിനാല് ലൈംഗികാതിക്രമ പരാതി നിലനില്ക്കില്ലെന്നാണ് കോഴിക്കോട് ജില്ലാ സെഷന്സ് കോടതി ജഡ്ജി എസ് കൃഷ്ണകുമാര് കഴിഞ്ഞ ദിവസം പുറപ്പെടുവിച്ച വിധിയില് പറയുന്നത്.
കോഴിക്കോട് ജില്ലാ സെഷന്സ് കോടതിയുടെ ഉത്തരവിനെതിരെ സമൂഹത്തില് നിന്നും കടുത്ത വിമര്ശനമാണ് ഉയര്ന്നുവന്നത്. ഈ സാഹചര്യത്തിലാണ് ഹൈക്കോടതിയെ സമീപിക്കാന് സര്ക്കാര് തീരുമാനിച്ചത്. ജാമ്യ ഉത്തരവ് നിയമപരമായി നിലനിൽക്കില്ലെന്നാണ് സര്ക്കാര് വാദം. ഉത്തരവിൽ പറഞ്ഞ കാര്യം ഇന്നത്തെ സമൂഹത്തിനു അംഗീകരിക്കാൻ കഴിയില്ലെന്നും ഹര്ജിയിൽ ചൂണ്ടിക്കാട്ടും. സെഷൻസ് ജഡ്ജിയുടെ പരാമർശത്തിനെതിരെ ഹൈക്കോടതി രജിസ്ട്രാർക്ക് പരാതി നൽകാനാണ് ഇരയായ യുവതിയുടെ തീരുമാനം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ആക്ടിവിസ്റ്റും യുവ എഴുത്തുകാരിയുമായ യുവതിയാണ് സിവിക് ചന്ദ്രനെതിരെ പരാതി നല്കിയത്. 2020 ഫെബ്രുവരിയില് കൊയിലാണ്ടി നന്തി കടപ്പുറത്ത് നടന്ന കവിതാ ക്യാംപിനിടെ ആളൊഴിഞ്ഞ സ്ഥലത്തുവെച്ച് ലൈംഗികമായി പീഡിപ്പിക്കാന് ശ്രമിച്ചു എന്നായിരുന്നു യുവതിയുടെ പരാതി.
